Саҥа 2023 сылы Мэҥэдьэк нэһилиэгэ хаһааҥҥытааҕар да уратытык көрүстэ. Саха сиригэр физкультурнай хамсааһын 100 сылыгар анаан Мэҥэдьэктэр саҥа 2023 сылга үктэнээт, «көтөр мээчик» волейбол, «Мэҥэдьэк бөҕөһө» халбас харата хапсаҕай күрэҕинэн арыйдылар. Күрэххэ уопсайа 5 хамаанда кыттыыны ылла: студеннар хамаандалара, «Саһар5а» эдэр ыччат хамаандата, оскуола үлэһиттэрин хамаандата, оскуола үөрэнээччилэрин уонна олохтоох дьаһалта хамаандата. Хамаандалар бастаан волейболга, онтон халбас харата хапсаҕайга күөн көрүстүлэр. Тыҥааһыннаах киирсии түмүгүнэн, «көтөр мээчик» күрэххэ 1 үрдэл – студеннар хамаандалара, иккис «Саһарҕа» эдэр ыччат хамаандата, 3 үрдэл олохтоох дьаһалта хамаандата буоллулар. «Мэҥэдьэк бөҕөһө» хапсаҕай күрэҕэр 1 үрдэл оскуола учууталларын хамаандата, иккискэ олохтоох дьаһалта, 3 үрдэлгэ студеннар хамаандалара таҕыста.
Кыһыҥҥы сынньалаҥ, саҥа дьыл бырааһынньыктарыгар араас үөрэххэ үөрэнэ сылдьар студеннарбыт, атын сиргэ үлэлии-хамныы сылдьар ыччаттарбыт, биир дойдулаахтарбыт дойдуларыгар кэлэн, нэһилиэкпит олоҕо саамай оргуйар, сэргэхсийэр кэмэ буолар. Дьэ бу кэмҥэ араас тэрээһиннэр, култуурнай сынньалаҥнар ураты таһымҥа тахсаллар. Ол курдук, чөл олоҕу өрө туппут, кэнчээри ыччат чөл туруктаах буолуутугар улахан кылаатын хаалларбыт, элбэх оҕону спорт араас көрүҥэр уһуйбут, угуйбут, учууталлар учууталлара, Саха Республикатын үөрэҕириитин туйгуна, Саха Республикатын физкультураҕа уонна спорка туйгуна, М. Е. Николаев олохтообут «Билиигинэн кыайыаҥ», «Ньурба оройуонун социальнай экономическай сайдыытыгар кылаатын иһин» мэтээллэр хаһаайыннара Ксенофонтов Анатолий Васильевич 1995 сыллаахха тэрийбит «Мэҥэдьэк боотура» күрэҕи сөргүтэн, аатын уларытан «Мэҥэдьэк мадьыныта» мас тардыһыы күрэҕэ ыытылынна. Урукку сылларга чемпион үрдүк аатын сүкпүттэр: 1995,1996 сылларга Васильев А. В., 1997 сыллаахха Егоров А. В., көһө сылдьар кубок хаһаайыннарынан Петров П. Н., Дмитриев Н. В., Васильев С. А. буолбуттара. Петров П. Н., бастакы көһө сылдьар кубок хаһаайына, кубогын «Дьөһөгөй оҕото» түмэлгэ бэлэх уунна.
Быйылгы күрэххэ 75 киилэҕэ диэри уонна 75 киилэттэн үөһээ ыйааһыннарга уопсайа 8 ыччат күрэхтэстэ. Түмүккэ, 75киилэҕэ диэри ыйааһыҥҥа 1 миэстэ Васильев А. С., ЯКИТ устудьуона, 2 миэстэ Макаров О. М., ЯПК физкультурнай отделениетын устудьуона, 3 миэстэ Семянов В. В., олохтоох ыччат, 75 киилэттэн үөһэлэргэ муҥутуур кыайыылааҕынан Макаров Е. Е., народнай театр режиссера, 2 миэстэ Тимофеев С. С., Хатыы орто оскуолатын учуутала, 3 миэстэ Данилов Д. А., олохтоох залбыт тренерэ буоллулар. Сыаналаах бэлэхтэри спонсордаабыт урукку сылларга 3 төгүл кыайыылаах үрдүк аатын сүкпүт Дмитриев Н. В., индивидуальнай предприниматель Васильев И. А. махтанабыт.
Маны тэҥэ, И. Я. Танхаров аатынан култуура киинин дириэктэрин Федотова С. И. көҕүлээһининэн, кыһыҥҥы сынньалаҥнарыгар кэлбит студеннарбытын кытта көрсүһүүнү тэрийдэ. Оскуола улахан кылаас оҕолоро, олохтоох үлэһит ыччаттар уонна студеннар буолан, остуол тула атах тэпсэн олорон, сылаас үүттээх чээй иһэ-иһэ устудьуон эдэр эрчимнээх сылларын, оҕо саас умнуллубат түгэннэрин үөрэнээччилэргэ сүбэ-ама быһыытынан, араас мүччүргэннээх сырыыларын күлэ-сала кэпсээн бу киэһэни бэһиэлэйдик атаардылар. 4 хамаандаҕа арахсан оҕо саастарын санаан «квест» оонньууга үөрэ-көтө араас моһоллору, тургутуулары ааһан оонньоотулар.
Дьэ бу курдук, уһун киэҥ сынньалаҥнар нэһилиэк олохтоохторугар араас тэрээһиннэринэн, күрэхтэринэн, уоттаах-күөстээх үҥкүүнэн киэркэйэн биллибэккэ аастылар.
Матрена Габышева.
