Үчүгэйиэн бу сиргэ
Үөрэ-көтө сылдьарбыт,
Үтүө дьоннуун биир тэҥҥэ
Сэргэстэһэ хаамсарбыт.
Манна Ыраах Убайааҥҥа
Хоһоон көнө хонуута,
Ырыа ыллам ыллыга,
Көмүс тохтор тойуга.
Саха сиригэр Култуура сылыгар, Саха норуотун бастакы, бастыҥ бэйээт дьахтара, биир дойдулаахпыт Варвара Потапова үбүлүөйдээх күнүгэр сырдык аатын үйэтитэн Ньурбабыт оройуонугар 2026 сылтан ЫАМ ЫЙЫН 13 күнэ — Поэзия күнүнэн биллэриллибитэ барыбыт өрөгөй үөрүүтэ.
Ньурбалар бары билэр, ытыктыыр киһибит, Ньурбабыт тыйаатырын киэҥ сирдэринэн сураҕырдыбыт режиссер, Саха Өрөспүүбүлүкэтин искусствотын үтүөлээх деятеля, Ньурба улууһун бочуоттаах Юрий Алексеевич Макаров “Балбаара төрөөбүт күнэ-Ньурбаҕа поэзия күнэ буолуохтаах” диэн этиитин иилэ хаба ылан Ньурбатааҕы кииннэммит бибилэтиэкэ ситимин иһинэн үлэлиир, суруйааччы Дмитрий Пономарев-Дьолуолаах салайар “Ньурба уоттара” айар куттаахтар түмсүүлэрин актива үлэлэһэн Ньурба куорат, Ньурба оройуонун салалтата ыам ыйын 8 күнүгэр 28 № ылыммыт уурааҕа үйэлэргэ үлэлии туруо, Варвара Потапова сырдык аатын тула ньурбалартан айар-суруйар дьоҕурдаах дьоммут тапталлаах Ньурбабыт дорҕоонноох аатын ырааҕынан-чугаһынан иһитиннэрэ-биллэрэ туруохтара.
Ньурба Поэзия бастакы тэрээһинин үүнэр үйэлэргэ үрүҥ аанньал буолбут Варвара Потапова түмэл дьиэтигэр хоһоон түһүлгэтинэн бэлиэтээтэ.
Варвара хоһооннорун нөҥүө биһигиниин, биир дойдулаахтарыныын, кэпсэтэрин тэҥэ буолла.
Варвара Потапова… Аныгы саха поэзиятыгар кыыс-дьахтар аймах хото киирэригэр ыллык тэлбит, ааны аспыт киһибит кини. Сыллар аастахтарын аайы поэт Варвара Потапова литератураҕа, саха поэзиятыгар суолтатын өссө дириҥник өйдүүбүт. Ол айар үлэ ис кистэлэҥиттэн тахсар — саха поэзиятыгар ааспыт үйэ 70-с сылларыгар диэри эр киһи лиирикэтэ эрэ сайдан кэлбитэ. Онно аан бастаан, Ньурба кыыһа, саха дьахтара бэйэтэ ураты саныыр санаалааҕын, иэйэр куттааҕын, бөлүһүөктүү көрүүлээҕин итэҕэтэр хоһооннордоох Варвара Потапова аата күөрэйбитэ.
Ити тустаахха судургута суох дьыала этэ. Кини иннинэ да, кэннинэ да кистээн хоһоон суруйар, дьүөгэлэригэр эрэ көрдөрөр дьоҕурдаах кыргыттар бааллара. Ол эрээри хайа да кэмҥэ баар дьахтар хоһоонньукка дьиппиэн, кытаанах сыһыантан толлон, кыбыстан, симэлийэн хаалаллара.
Онтон Варвара Потапова олоҥхо Кыыс Ньургунун курдук хорсуннук ол боруогу атыллаан, кыратык да кэтэмэҕэйдээбэккэ, аһаҕастык бэйэтин санаатын ааҕааччыларыгар тириэрдибитэ.
Тууйулла сылдьыбыт дьахтар аймах санаата-оноото, иэйиитэ, ырата, олоҕу анаарыыта кини тэлэччи аспыт аанынан кутуллан, ситимнэнэн киирэн барбыта! Билигин саха литературатыгар ааттаах-суоллаах, айар-суруйар, хоһооннорун нөҥүө саха санаатын кырдьыктаахтык, доргуччу этэр кыыс-дьахтар элбэҕэ барыбыт киэн туттуута, өрө тутуута.
Саха тыла, поэзията сайдарыгар, бу сиртэн симэлийбэтигэр саха норуотугар үйэлээх уонна хаһан да сүппэт бэлэхтэри көмүс көлөһүннэрин тоҕон таһаарар үлэлээх поэттарбытыгар саха аймах үйэлэргэ махталлаах буолуо…
ЫАМ ЫЙЫН 13 КҮНЭ, ВАРВАРА ПОТАПОВА ТӨРӨӨБҮТ КҮНЭ – НЬУРБАҔА ПОЭЗИЯ КҮНЭ.
УРУЙ! АЙХАЛ!
