Бүгүн ахсынньы ый 15 күнүгэр биир дойдулаахпыт СӨ биллиилээх государственнай, общественнай-политическай деятелэ, СӨ бочуоттаах олохтооҕо, оройуон историятыгар салайар үлэҕэ үрдүк таһаарыылаахтык үлэлээн ааспыт, чаҕылхай салайааччы Варвара Андреевна Петрова төрөөбүтэ 85 сылын туолар.
Өрөспүүбүлүкэ салалтатыттан саҕалаан 2021 сыл устата оройуон общественноһа,төрөөбүт Үөдэйин, үлэһит буолбут Хаҥалаһын нэһилиэктэрэ, В.А.Петрова аатынан кыраайы үөрэтэр түмэл сыл устата элбэх тэрээһиннэри ыытан кэллилэр. В.А. Петрова төрөөбүтэ 85 сылыгар анаммыт “Мы помним их имена” диэн Ньурба оройуонун нэһилиэктэрин икки ардыгар ыытыллар эстафетаҕа оройуон бары нэһилиэктэрэ, Ньурба куорат кыттыыны ылан араас хабааннаах тэрээһиннэри ыыттылар. Биир историческай, сырдык умнуллубат өйдөбүлү хаалларбыт түгэннэринэн улуус баһылыга А.М. Иннокентьев салайааччылаах, К.Д.Уткин аатынан Норуоттар доҕордоһуулара музей директора А.А.Туманова,Үөдэй нэһилиэгин баһылыга М.П.Николаева Хаҥалас оскуолатын директора Л.Н.Васильев уо.д.а састааптаах делегация Варвара Андреена үлэлээн ааспыт Муома, Абый улуустарыгар сылдьыылара буолар.
Биһиги нэһилиэкпитигэр кулун тутар ыйга Мэҥэдьэк нэһилиэгэ кэлэн эстафетаны туттаран ахтыы киэһэтэ ыытыллыбыта.
Алтынньы ыйга СӨ норуодунай суруйааччыта Наталья Михалева-Сайа Саха НКИХ режиссера Нина Саввична Корниловалыын В.А. Петрова аатынан кыраайы үөрэтэр түмэлгэ кэлэн «Хотун ийэ баһылык» документальнай киинэ устуутугар үлэлээн барбыттара. Сэтинньи ыйга оройуоннааҕы үөрэх салаата, Н.И. Кочнев аатынан Хаҥалас орто оскуолатын, түмэл тэрийиилэринэн куйаар ситимин нөҥүө Зуум платформаҕа В.А. Петрова олоҕор, үлэтигэр анаммыт республиканскай научнай практическай конференция ыытыллыбыта. *4-с «Ее имя присвоено» секцияҕа олохтоох оскуола 10-с кылааһын үөрэнээччитэ Виолетта Иванова (сал. Третьякова А.А.) бастакы миэстэни ылбыта.
Ахсынньы ыйга Н.Г.Чернышевскай аатынан Бүлүүтээҕи педколледж студеннарын делегацията кэлэн ыалдьыттаан В.А.Петрова аатынан кыраайы үөрэтэр түмэли билсэн астынан бардылар. Сыл устата нэһилиэккэ олохтоох оскуолаҕа кылаас чаастара, музейнай, библиотечнай уроктар, быыстапкалар, кыраайы үөрэтэр түмэлгэ көрсүһүүлэр тиһигин быспакка ыытылыннылар.
Ахсынньы ый 14 күнүгэр СӨ муниципиальнай сулууспа туйгуна, кыраайы үөрэтээччи Васильева Александра Петровна бэлэмнээбит «Норуотум көтөр кынатым, үлэм үҥэр таҥарам»- диэн кинигэ Ньурба оройуона МО үбүлээһининэн күн сирин көрдө. Кинигэ «Сайдам» кинигэ кыһатыгар, 300 ахсаанынан таҕыста.
Саха норуотун, Ньурба сирин хорсун-хоодуот, ньургун дьахтара Варвара Андреевна.Петрова олорбут олоҕо, охсуспут охсуһуута, айымньылаах үлэтэ төрөөбүт норуотугар, Ньурбатын дьонугар-сэргэтигэр мэлдьи махталынан ахтылла, үлэннэн уруйдаммыт албан аата ааттана туруоҕа диэн туран, Варвара Андреевна бэйэтэ эппит кэскиллээх тылларынан түмүктүөхпүн баҕарабын: “Мөлтөөн-ахсаан биэрбэккэ,биир сүбэни тобулан, биир суолу тутуһан олордохпутуна, таһаарыылаахтык үлэлээтэхпитинэ-хамсаатахпытына ситиһии, инникигэ хорсун хардыы оҥоһулла туруоҕа”, — диэн. Оннук да буола турдун.
М.Н. Николаева, олохтоох библиотека үлэһитэ.
В.А. Петрова аат. кыраайы үөрэтэр түмэл. Хаҥалас
