Кулун тутар ый Ньурба оройуонун библиотекатын ситимигэр Өксөкүлээх Өлөксөй ыйынан биллэриллибитэ хаһыс да сыла буолла. Бүгүн Хатыы орто оскуолатын үөрэнээччилэригэр айар тыл аҕата, саха литературатын төрүттээччи, айанньыт, саха бастакы үөрэхтээҕэ, саха былыргы олоҕун чинчиһитэ, бөлүһүөгэ А.Е.Кулаковскай туһунан библиотечнай уруок ыытылынна.

Маҥнай кылгастык суруйааччы олоҕун-дьаһаҕын туһунан кэпсэттибит. Саха сирин бары улуустарын кэрийэн, норуот тылынан уус-уран айымньытын хомуйааччы быһыытынан араас элбэх таабырыны, номохтору, өс хоһооннору хомуйбута биллэр.

Оскуола үөрэнээччилэригэр А.Е.Кулаковскай хомуйбут өс хоһооннорун ситэриигэ хамаанданан күрэхтэстилэр. Иккис түһүмэҕинэн суруйааччы биллэр айымньыларын ааттара буккуллан хаалбытын холбоотулар. Манна уолаттар хамаандалара ордук чорбойон таҕыста. Үһүс түһүмэҕинэн, «Өксөкүлээх үөрэҕэ» диэн суруйааччы кэнчээри ыччакка хаалларбыт араас айымньылартан ыллыбыт кэс тылларынан, алгыс тылларынан плакат оҥордулар.

Ону сэргэ, А.Кулаковскай биир биллэр «Саха дьахталларын мэтириэттэрэ» айымньытынан Мэҥэдьэк кэрэ аҥардара кыбытыгынан тикпит мааны панноларынан саха дьахталларын мэтириэттэрин көрдүлэр, иһиттилэр. Бүтэһигэр, «Өксөкүлээх сардаҥатын» Хатыы орто оскуолатыгар уматтыбыт. Бу тэрээһинтэн үөрэнээччилэр тугу эмит билэн, саҥаны иҥэринэн, Өксөкүлээх үөрэҕиттэн өйдөрүгэр хаалларан, тарҕаспыттара буолуо диэн эрэнэбит. Өксөкүлээх кэнчээри ыччатыгар анаабыт кэс тыла, алгыс тыла барыларыгар тиийиэхтин.

Матрена Габышева, Мэҥэдьэк.