Ньукулай Чуор

Айылҕа барахсан саамай тупсан күөх сирэминэн чэлгийэр кэрэ кэмигэр,1935сыл бэс ыйын 2 күнүгэр,  лирик-поэт, литературнай критик, публицист, суруналыыс, Саха Республикатын култууратын үтүөлээх үлэһитэ, Россия суруналыыстарын сойууһун бириэмийэтин лауреата, чилиэнэ, Саха Өрөспүүбүлүкэтин суруйааччыларын Сойууһун чилиэнэ, Ньурба, Сунтаар улуустарын бочуоттаах олохтооҕо Николай Иванович Харитонов – Николай Чуор күн сиригэр кэлбитэ.

Николай Иванович мэлдьи олох оргуйар үөһүгэр  сылдьыбыт бэйэтин көлүөнэтин чаҕылхай дьонноруттан биирдэстэрэ. Благовещенскай куоракка пединститут биолого-географическай факультетын бүтэрэн учууталынан, оскуола директорынан үлэлээбитэ. Дьону  түмэр, көҕүлүүр ураты дьоҕурдаах,  төлөннөөх комсомольскай лидер быһыытынан үтүө өйдөбүлү хаалларбыта. Николай Чуор саха бэчээтэ уонна журналистиката сайдарыгар дьоһуннаах кылааты киллэрбит киһи. Н. “Ньурба уоттара”, Сунтаар улууһугар “Ньургуһун”, Мирнэй куоракка “Кимберлит”айар түмсүүлэри быһаччы тэрийбит, үлэлэрин сүрүннээбит, элбэх саҥа ааттар айар-суруйар ыллыкка үктэниилэригэр олук уурбут чаҕылхай тэрийээччи буолар.

Н.И.Харитонов — Чуор Ньурбатааҕы киин бибилэтиэкэ улахан доҕорун, бастыҥ ааҕааччытын быһыытынан, бибилэтиэкэ сайдыытын кэскилигэр улахан кылаатын киллэрсибит киһинэн биллэр. Ол туоһута араас тэрээһиннэргэ кыттыыны ылбыт хаартыскалара, суруктара, автографтаах кинигэлэрэ бибилэтиэкэ фондатыгар кичэллээхтик харалла сылдьаллар. Кини аатын, үлэтин үйэтитиигэ үлэлэр сылын аайы ыытыллаллар. 1971 сыллаахха тэрийбит «Ньурба уоттара» билиҥҥи кэмин айар — суруйар дьонун түмсүүтэ Ньурбатааҕы кииннэммит бибилэтиэкэ ситимин иһинэн үлэлиир.

Бу ый, бэс ыйын 10 күнүгэр, күндү ааҕааччыларбытын «Чуору ааҕабыт!» ааҕыы чемпионатыгар күүтэбит. Сиргэ үтүө санаалаах, ситтэрбэтэх кэрэлээх, саныыр сырдык ыралаах умсулҕаннаах олоҕу олорбут, олоҕу хоһоонунан хоһуйбут биир дойдулаахпыт Н.И.Харитонов — Чуор аата чуордук дуорайа турдун үйэлэри уҥуордаан……