Күн ордук күлэр, күөх айылҕа саҥардыы тыллар ыам ыйа — дьиҥнээх ураты кэрэ ый. Бу кэрэ кэмҥэ Хаҥалас нэһилиэгин хорсун эр хоһууттара сайын кэлбит үөрүүтүн үллэстэн, сааскы булдуттан айылҕа бэлэҕин — олгуйга буспут минньигэс куһу — нэһилиэкпит ытык кырдьаҕастарын, аҕам саастаах ытык дьонун ыҥыран күндүлээтилэр. Дьикти үчүгэй тэрээһин буолла!

Бу үөрүүлээх түгэни нэһилиэкпит баһылыга истиҥ эҕэрдэ тылынан аста, кэлбит дьону-сэргэни айхаллаата. Тэрээһин ырыа-тойук, үҥкүү-битии аргыстаах бэҕэстээн, өссө кэрэ көстүүлэннэ: иккис кылаас оҕолорун чуор куоластара, Ксения Иванова, Альфред Кононов дьүрүскэн ырыалара дьон-сэргэ дууһатын таарыйдылар, үөрүүлэрин үрдэттилэр. Ону таһынан, олус интэриэһинэй викторина ыытыллан, кыттыбыт дьон бары илии тутуурдаах, өттүк харалаах үөрэн-көтөн бардылар.

Мустубут дьон ирэ-хоро кэпсэтэн, оонньоон-көрүлээн, үөрүү-көтүү буолан тарҕастылар. Кинилэр харахтарыгар үөрүү уота мичилийэ, сүрэхтэригэр сырдык санаа иҥэн хаалла.

Бу кэрэ, умнуллубат түгэни тэрийбит хорсун эр хоһууттарбытыгар, уонна ырыа-тойук эйгэтинэн киэргэппит «Тойук» Норуот айымньытын дьиэтин коллективыгар, бары көмөлөспүт дьоммутугар өссө төгүл дириҥ махталбытын тиэрдэбит!

Сылаас тыыннаах Иэйиэхсит ыйа — күн ордук күлэр, күөх тыллар ыам ыйа инникитин даҕаны сылааһынан угуттуу, үтүөнү-кэрэни үксэтэ турдун!

✍️Анжелика Васильева