Ыам ыйын 13 күнэ – Саха поэзиятыгар дьахталларга бастакынан суол тэлбит, саха бастакы поэт дьахтарынан биллэр биир дойдулаахпыт Варвара Потапова төрөөбүт күнэ. Быйыл кини төрөөбүтэ 79 сыла. Бу күн Ньурба айар-суруйар дьоҕурдаахтара түмсэн ыраах Убайааҥҥа баар поэт түмэл дьиэтигэр ахтан-санаан ааһар идэлээхтэр. Быйылгы ыам ыйын 13 күнүнээҕи тэрээһинтэн санаатын үллэстэр «Кыраһа», «Ньурба уоттара» түмсүүлэр көхтөөх кыттыылааҕа Антоновка олохтооҕо Антонина Архиповна Яковлева:
«Сырыы аайы долгуйа киирэбин Варвара Потапова уһаайбатыгар. Бүгүн эмиэ төрөөбүт күнүгэр муһуннубут, хоһооннорун истээри, кэрэҕэ сыстаары, сүрэхпит долгуйа тэптэ. Үрдүккэ,сырдыкка ыҥырар дьикти тыллардаах хоһооннору барыбыт дьолбутугар ураты дьоҕурдаах айылҕаттан айдарыылаах, хоһооннору өйүттэн ааҕар Луиза Акимовна барыбытын сөхтөрө аахта. Варвара Потапова, Василий Саввин уонна олохтоох автордар хоһооннорун. Талааннаах кыыспыт сүрэҕин итии төлөнүнэн суруйан хаалларбыт хоһооннорун иһиттибит уйадыйа. Кини сүдү талааныгар саҥата суох сүгүрүйэ. Эдэркээн музей үлэһиттэрэ уһаайбаны киэргэппиттэрэ хараҕы үөрдэр.
Дьиэ сылааһынан илгийэр. Алаадьы буһаран дьиэ иһэ алаадьы сытынан тунуйан дууһабытын сылытта. Хатыҥ сэбирдэҕин оҥорон онно хоһоон тылларын суруйбуттара бүгүҥҥү күнү ураты тыыннаата. Ити барыта эдэркээн оҕолорбут Прасковья Дмитриевналар, Николай Филиппов уонна Александра Петровна үлэлэрин түмүгэ. Быйыл Ньурбаттан суруйааччыбыт Ангелина Николаевна Данилова 75 сааһын туоларынан «Ангелина айымньыларын суолунан…» диэн ааттаан киин бибилэтиэкэттэн түмсүүлэрбитин салайан үлэлэтэ сылдьар Васильева Р.П., Софронова Е.И. Ангелина Данилова олоҕун, суруйууларын элбэҕи кэпсээтилэр. Мархаттан төрүттээх Ангелина Данилова ураты иэйиилээх айымньыларын Рея Петровна,Елена Ивановна ааҕан, кэпсээн сэргэхситтилэр.
Бүгүн 13 чыыһыла, мустубут дьон 13 эбиппит. Рея Петровна эппитин соһуйа иһиттибит. Цифры и символы правят миром дииллэр. Туох эрэ баар быһыылаах биһиги билбэппит. Олус үчүгэй истиҥ кэпсэтии буолла. Лицей учуутала Александра Валерьевна, Дьиикимдэ библиотекара Светлана Никандровна санааларын сайа эттилэр. Тула салгын үөрэн хамсыырга дылы. Элбэх алаадьы тэлгэнэн, итии чэйдээх термостар кэккэлэһэн санаабытыгар уһаайба үөрдэ көттө, сэргэхсийдэ. Киэргэнэн, алаадьы минньигэс сытынан тунуйан тиэргэн, дьиэ чэмэлийэ сырдаабыт, үөрбүт курдуктар. Тиэргэҥҥэ икки ыт саҕаланыаҕыттан бүтүөр диэри сырыттылар. Алаадьы сиэн астыннылар. Тоҕо эрэ аймана санаан кэллим Варвара Потапова хоһуйбут оҕо сааһын ытын, атаҕын салыырын, куоракка барарыгар сайыһа хаалбытын, сотору өлбүт сураҕа иһиллибитин… Барарбытыгар утары суолга эмиэ ыт утары иһэрэ. Алаадьы, бичиэнньэ биэрэн күндүлээтибит…
Махтал бүгүн көрсүбүт үтүө мааны сахам далбар куоларыгар. Бары күүстээх кынат буолан түмсэн ааспыппытыгар. Махтал үтүө мааны дьикти дьоҕурдаах Луиза Акимовнаҕа сэмэй хоһооммун ааҕан үөрдүбүтүгэр. Саха тыллаах баарын тухары күөх Ньурба талааннаах кыыһа, саха бастакы поэтессата, Варвара Николаевна хоһоонноро ааҕылла турдуннар. Бар дьон махталын ыла турдун. Түмүкпэр махталбын тиэрдиэм этэ бүгүҥҥү күммүт кынаттаах суоппарыгар, суруйааччы Суһум кэргэнигэр Афанасий Егоровичка. Аһара сынньалаҥнык олордон, илдьэн, аҕалан биэрэн эдьиэй Таисия биһикки олох хотуттардыы сырыттыбыт, ис куппут үөрдэ көттө. Махтал бүгүҥҥү сардаҥалаах күммүтүгэр, угуттаабыт эмтээх салгыныгар!
Сэҥээрбиккитигэр махтал,үтүө мааны дьүөгэлэрим.Бэҕэһээ ураты да күн ааста. Дууһалыын сырдаатыбыт.Арааһа Варвара Потапова көстүбэт кута үөрдэ көттө дуу,туох билиэй,туох таайыай,ол көстүбэт эйгэ кистэлин? Луиза Акимовна поэтесса хоһооннорун ааҕарыгар тула барыта сырдаан,үөрбүт курдук буолбута дии,дьиэ түннүктэрин таастара сандаарыһан ылбыттара…
Ураты да күн ааста. Дууһалыын сырдаатыбыт. Арааһа, Варвара Потапова көстүбэт кута үөрдэ көттө дуу, туох билиэй, туох таайыай, ол көстүбэт эйгэ кистэлэҥин? Луиза Акимовна поэтесса хоһооннорун ааҕарыгар тула барыта сырдаан, үөрбүт курдук буолбута, дьиэ түннүктэрин таастара сандаарыһан ылбыттара…»
