Күндүл күөх халлааннаах, чаҕылхай көмүс күннээх күүтүүлээх кэммит, дьэ, үүннэ! Күөххэ үктэммиппитин бэлиэтээн, бүгүн кырачаан оҕолорго анаан сайыны көрсүү тэрээһинэ ыытылынна.

Ньурба куорат “Аленушка” уһуйаанын улахан бөлөҕүн иитиллээччилэрэ уонна иитээччилэрэ мааны ыалдьыт буоллулар. Оҕолордуун сайын бэлиэлэрин — айылҕа уһуктуутун, көҕөрүүтүн, үөн-көйүүр тиллиитин, көтөр-сүүрэр төрүүрүн-ууһуруун тула кэпсэтистибит.

Бу күн урут сайылыкка көһүү буоларын кырачааннар сэргии иһиттилэр. Тэрээһин устата болҕомтолоохтук олорон, билиилэрин хаҥаттылар, саҥа тыллары чиҥэтэн, хатылыы олордулар. Былыр-былыргыттан илдьэ кэлбит өбүгэбит үгэһин – саламаны хайдах уонна тоҕо оҥоһулларын билиһиннэрдибит. Ол кэннэ оҕолор бэйэлэрэ кырачаан тарбахтарынан салама баайарга холоннулар.

Бука барыларыгар сатанан, санаалыын көнньүөрэн, салгыы кэпсээнньит оҕолору чуумпуран иһиттилэр. Ол курдук, «Аленушка» уһуйаан иитиллээччитэ Иванова Юля кэҕэ туһунан билиһиннэрдэ.

Онно эбии кэҕэ “кук-кууктуурун” иһиттилэр, “атын ийэҕэ” иитиллэрин видео нөҥүө биллилэр. «Кыталык» уһуйаан иитиллээччитэ Огочоев Руслан ньургуһун туһунан кэпсээтэ. Кини маҥнайгынан тахсар айылҕа кэрэ сибэккитин харыстыырга ыҥырда.

Онтон оҕолор “Тооку” ойуулуктан быһа тардыыттан ньургуһун туһунан ырыаны ылластылар. Салгыы Петрова Элана, «Светлячок» уһуйаан иитиллээччитэ, алаадьы хайдах астанарын сиһилии кэпсээн баран, саһарчы буспут алаадьыны оҕолорго көрдөрдө. «Кыталык» уһуйаан иитиллээччитэ Конощук Тимур эһэтэ оҥорбут ытыгын туһунан кэпсээтэ.

Кини ийэтинээн оҕолор иннилэригэр күөрчэх ытыйан көрдөрдүлэр. Ол кэннэ бука бары остуол тула мустан, сахалыы баахылалаах, алаадьылаах күөрчэҕи астына-дуоһуйа амсайдылар.

Түмүккэ сайыммыт кэлбит үөрүүтүгэр саламабытын саҥардыы тыллан эрэр хатыҥҥа ыйаан, бүгүҥҥү тэрээһини түмүктээтибит. Бу үүммүт сайын оҕолорго, улахан дьоҥҥо ураты кэрэ күннэри, үгүс үөрүүнү эрэ бэлэхтээтин диэн баҕара хаалыаҕыҥ!

Бибилэтиэкэр Ушканова Я.В