Ыам ыйын 22 күнэ – Ньукуолун таҥара күнэ. Сахаларга бу күн — сайыны көрсөр, күөххэ үктэммит бэлиэ күн. Былыр-былыргыттан биһиги норуоппут Ньукуолун күнүгэр күүтүүлээх самаан сайын кэлиитин бэлиэтиир үтүө үгэстээх. Бу күн Саха сирин олохтоохторо алаадьы астаан, кус минэ буһаран чугас дьоннорун күндүлүүллэр, айыылартан өҥ-быйаҥ сайыны көрдөһөн, сири аһаталлар.

Мэҥэдьэк нэһилиэгэр үгэс буолбут сайыны көрсүү сиэрэ-туома, күөххэ үктэммит үөрүүлээх түгэнэ «Дьөһөгөй оҕото» түмэл иннигэр нэһилиэк дьоно мустан сайыны көрүстүбүт. Кэлбит дьону алгыстаах алаадьынан, арыылаах саламаатынан, көөнньө сылдьар быырпаҕынан айах тутан бу үөрүүлээх күнү бэлиэтээтибит.

Сайыммытын уруйдуу түмэл методиһа Кириллина А. В. алгыс тылынан, аал уоппутун уйгу-быйаҥ дэлэйэрин, саргы салалларын туһугар арыылаах алаадьынан, уохтаах кымыһынан айах тутан алҕаата, арчылаата.

Улуу Кыайыы үбүлүөйдээх 80 сылынан режиссер Егорова М.А. туруорбут «Мин мантан сэриигэ барбытым» дьүһүйүү көрөн, библиотекарь Габышева М.Г. тургутугар оонньоон, кыл кылыһах тыаһыгар уйдаран, кэлбит дьон сэргэхсийэн, үөрэн-көтөн тарҕастылар.

Бүгүн сайыҥҥылыы куйаас сайын сылаас салгынынан саба биэрэн, кэҕэ чоргуйар саҥатынан, кыл кылыһах кырыымпа көмүс дорҕоонунан, оҕо хатан күлүүтүнэн, оһуордаах оһуокай үҥкүүлээх самаан сайыммытын уруйдаатыбыт.

Матрена Габышева