Ыамыйын 25 күнүгэр Сахабыт сирин үрдүнэн төрүттэрбититтэн илдьэ кэлбит бастыҥ баайбытын-оһуокай күнүн-бэлиэтиибит.
Оһуокай олоҥхону кытта биир силистээх-мутуктаах, айылгылаах саха омук, ааһа баран, түҥ былыргы түүрк омуктар дириҥ итэҕэллэрин өҥ быйаҥнаах буор оҥостон, ситэн силигилээн кэлбит норуот улуу айымньыта, уратыта, бэлиэтэ буолар.
Бүлүү бөлөх оһуокайа, бүлүүлүү оһуокай диэн Бүлүү сүнньүн батан олорор улуустар оһуокайга дьиэрэтэн тойугунан саҕалаан төрүт былыргылыы хоһуйууну, үктэниини күн бүгүҥҥэ диэри илдьэ сылдьар үгэспитин этэллэр.
🍃Киэҥ Ньурба, күөх Ньурба тойуктаах оһуокайынан аатырыан аатырар. Хоһуйар хоһооннорунан, кэрэ куоластарынан аатырар оһуокай таһаарааччыларбыт былыр да билигин да тапталлаах Ньурбабыт кэрэ аатын ырааҕынан-чугаһынан күүскэ иһитиннэрэллэр, биллэрэллэр.
Дьоннор уот номоҕор хаалбытынан И.М. Харитонов-
Саахардаах Дьуона аата күн бүгүҥҥэ диэри кэпсэлгэ сылдьар.
20 үйэ 70 – нус сылларыттан оһуокайы үйэтитэргэ күүскэ ылсан үлэлээбит фольклорист В.С. Лосотов фондата өссө да кэлэр үйэлэргэ саха омукка оһуокайы иһитиннэрэ туруоҕа. Кини тиһигин быспакка утумнаахтык үлэлээбитин түмүгэр сүүһүнэн ахсааннаах оһуокайдьыттарбыт этэн-ыллаан-туойан хаалларбыт оһуокайдарын көрөр-истэр дьоллоохпут.
Н.Ф. Осипов-Чоомуут, Н.Н. Егоров-Ньукутта, С.Н. Тимофеев-Сыччыкы, М.Н. Петрова-Тойуктаах Марыына, Е.М. Егоров, А.Н. Степанов, П.Н., Степанов, Д.Г. Егорова-Ырыа Даарыйа, В.М. Васильева, И.В. Додохов, В.Д.Егоров-Айах Баһылай, П.Д. Тогонохов, С.В. Семенов – Сиэдэрэй Сэмэн,Г.С. Семенов-Дырбыкы уонна да элбэх, төрүт оһуокайы илдьэ сылдьыбыт чулуу-бастыҥ дьоммут оһуокайдара уһуллубут 100 ахсааннаах аудио-видео кассеталара Саха сирин гуманитарнай чинчийии институтугар, Дьокуускай куорат норуот айымньытын дьиэтигэр, Бүлүү бөлөх музейдарынан уонна да атын сирдэринэн харалла сыталлар. Фонда сүрүн чааһа Ньурбатааҕы «Олоҥхо» медиа кииҥҥэ баар. Бу матырыйаалларга олоҕуран кинигэлэр тахсаллар, урукку кассеталартан саҥа формакка хостоонуһуллаллар….
Билиҥҥи кэм ыччата өбүгэ үгэһин сүтэрбэккэ илдьэ сылдьара сарсыҥҥы күҥҥэ эрэли саҕар. Саха норуотун оһуордаах оһуокайа үйэлэргэ тыыннаах буолуо диэн бигэ эрэллээх бар дьоммутугар Ньурба сирин билиҥҥи кэмин талааннаах оһуокайдьыта Валерий Платонов сахалыы куппутун уһугуннарар, эмтиир эрчимниир оһуокайын бэлэх уунабыт!
Сиһилии манна көрун
