Дьиэ иһигэр эбэһээт
Ийэ, аҕа баар буолуохтаах,
Олор тула сэрбэчиһэн,
Оҕо сүүрэ сылдьыахтаах.
Баар буолуохтаах эйэҕэстэй
Эбээ дэнэр сүдү киһи,
Уонна кини таһыгар,
Эһээ дэнэр улуу киһи.
Бу кинилэр бары бииргэ
Дьол уйатын туталлар,
Дьоллоох олох укулаатын
Бары бииргэ оҥороллор. Сарыада Ньурба.


Самаан сайыммыт сайаҕас күнүгэр, Антоновка сэлиэнньэтин “Түһүлгэ киэргэллэрэ”норуот айымньытын дьиэтигэр от ыйын 11 күнүгэр 10 оҕолоох Герой ийэ, алын сүһүөх оскуолаҕа бастакыттан төрдүскэ диэри үөрэтэн-уһуйан 35 сыл учууталлаан 10 кылааһы кынаттаан көтүппүт Дария Федоровна Яковлева «Ньурба сулустаах ийэлэрэ» кинигэни хомуйан-оҥорон таһаарбыт үөрүүтүн үллэстэр сүрэхтэниигэ элбэх киһи муһунна. Дьоро түгэн Яковлевтар 10 бииргэ төрөөбүттэр уонна кинилэр дьиэ кэргэттэрин толорууларыгар Айтыына Уран тылларыгар, Марианна Федотова — Намыына матыыбыгар «Дьиэ кэргэн» ырыанан күргүөм толоруунан саҕаланна.

Ньурба сирин — Ньурба куорат уонна 18 нэһилиэк 136 герой ийэлэрин дьылҕата үйэтитиллибит «Ньурба сулустаах ийэлэрэ» кинигэни бэлэмнээн таһаарбыт Дария Федоровна Яковлеваҕа өрөспүүбүлүкэ социальнай-экэнэмиичэскэй сайдыытыгар кылаатын иһин «Гражданскай килбиэн» бэлиэни «Ньурба улууһа» Муниципальнай Оройуон баһылыгын эбээһинэһин толорооччу Василий Николаевич Семенов үөрүүлээх быһыыга-майгыга туттарда.


«Ньурба сулустаах ийэлэрэ» кинигэ үлэтин тула кэпсэтиини ыытта Яковлевтар орто кыыстара, Саха государственнай драматическэй тыйаатырын артыыһа, СӨ култууратын туйгуна Лена Маркова.
Кинигэҕэ киирии тылын литератураны ырытааччы, литературовед, тыл үөрэҕин билимнэрин доктора, Саха Өрөспүүбүлүкэтин суруйааччыларын Сойууһун чилиэнэ, ХИФУ профессора Варвара Борисовна Окорокова уонна «Ньурба улууһа» муниципальнай оройуон баһылыга Алексей Михайлович Иннокентьев суруйбуттар.


Үөрүүлээх тэрээһин тосхолун оҥордо Ньурбатааҕы Ф.Г. Сафронов аатынан киин бибилэтиэкэ ааҕааччыны кытта үлэлиир отдел кыраайы үөрэтэр салаа бибилэтиэкэрэ, «СӨ култууратын туйгуна» Ноева Маргарита Романовна.
Ааҕааччыны кытта үлэлиир салаа.

Уолаттарын уһанарга,
Булка хайдах үөмэргэ,
Айылҕаны харыстыырга
Эһэ, аҕа үөрэтэр.
Ас астыырга,иистэнэргэ
Дьиэ иһигэр муудараска
Эбээ, ийэ такайар
Кыргыттарын үөрэтэр.
Ийэ киэнин ситэрэр
Сир түннүгэ, эбээ буолар,
Аҕа киэнин көннөрөр,
Эһээ киһи барахсан.
Ситэтэ суох дьиэ кэргэҥҥэ,
Оҕо олус тэһийбэт,
Тугу эрэ көрдүү сылдьар,
Итэҕэһи була сатыыр.
Оннук оҕо хаҕыс буолар,
Истиҥ сыһыан тиийбэт эбит,
Айыыларбыт ол иһин
Бу түөрт дьону биэрбиттэр.
Харыстаһыҥ бэйэҕитин,
Олох суолун тэлэр дьоммут!
Олох араас очурдарын
Туоратыһыҥ бары бииргэ!
Эһигиттэн тутулуктаах,
Төрүччүгүт дьылҕата,
Хас биирдиигит дьол суһумун
Ыкса тутан олоруохтаах!
САРЫАДА НЬУРБА