1969 сыллаахха, культпросветучилищены бүтэрэн кэлбиппэр, Ньурба култууратын отделын сэбиэдиссэйэ К.Д.Уткин истиҥник көрсөн, оройуоннааҕы бибилэтиэкэ сэбиэдиссэйин кытта звоннаһан баран, ааҕааччыны кытта үлэлиир отделга, абонемеҥҥа үлэһитинэн анаан бирикээс таһаарда уонна үлэҕэр туох эбит күчүмэҕэй боппуруос баар буоллаҕына кэлээр, ситиһиилэхтик үлэлээ диэбитэ.
Нөҥүө күнүгэр бибилэтиэкэ боруогун атыллаан киирбиппэр Лидия Александровна Ларионова эйэҕэстик көрүстэ, үлэлиир миэстэбэр атааран иһэн, үлэһиттэри кытта билиһиннэрдэ. И.В.Колпашникова читальнай зал сэбиэдиссэйэ, Е.И.Садовникова – передвижка үлэһитэ эбиттэр. Ол кэннэ үлэ-хамнас туһунан кэпсээтэ. Аан дойду үрдүнэн Улуу Кыайыы 25 сылын, В.И.Ленин 100 сааһын, дойду суруйааччыларын бэлиэ күннэрин көрсө улахан тэрээһиннэр буолалларын сырдатта уонна үлэбэр ситиһиилэри баҕарда.
Өйдөөн көрбүтүм бастакы сэбиэдиссэйим омуга саха, кыыс оҕо курдук фигуралаах, дьүһүнэ сырдык соҕус, чуолкай саҥалаах эбит. Кэлин истибитим Ленскэй оройуонугар күн сирин көрбүт, 1925 сыллаах үһү.
Олох саҥа ирдэбилин ылынар, киэҥ толкуйдаах, коллективын дьонугар тэҥ сыһыаннаах, бэйэтин үлэтин чахчы баһылаабыт, компартия актыыбынай чилиэнэ, общественнай үлэттэн туора турбат, партком, профсоюз комитетын састаабыгар мэлдьи баар. Клуб революционной, боевой, трудовой славы, оройуон дьахталларын холбоһугун салайсыбыта, маны таһынан мандолинаҕа оонньуур буолан РДК струннай оркестрыгар солбуллубат чилиэнэ этэ.
Бэйэтин үлэтин чахчы баһылаабыт салайааччы, общественник, дьону-сэргэни кытта тапсар буолан оройуон салалтата, общественноһа библиотекаүлэтин, материальнай базата бөҕөргүүрүгэр туора турбат, мэлдьи өйүүр, көмөлөһөр этилэр.
Дьиэтигэр эрэллээх кэргэн, тапталлаах ийэ, эйэҕэс эбээ этэ. Сатаабата диэн суох этэ, бэртээхэй иистэнньэҥ, минньигэс астаах асчыт, айылҕаҕа тэллэйдьитэ, сир аһыгар сылдьарын туохтааҕар да ордороро, онтун астаан амсатара – минньигэһэ бэрт буолааччы. Кэргэнэ Иван Григорьевич Ларионов оройуон нотариуһа, сэрии кыттыылааҕа, хас да бойобуой орденнаах, мэтээллээх этэ, сытыары көнө майгылаах этэ. Икки уол оҕолоохторо, ийэлэрин утумнаан бибилэтиэкэ тутаах үлэһиттэрэ этэ.Уолаттарын Ваняны, Сашаны түгэнинэн туһанан ахтыбатахпына сатаммат курдук.
Улахан уол Ваня – Иван Иванович кинигэ, сурунаал, хаһыат диэн баран муннук аайы ытаабыт, онтун умнубакка сылдьара, биһиэхэ кэпсиирэ, барыны бары билэрэ, грамотнайа, массыынкаҕа бэчээттиирэ түргэнэ, майгыта сайаҕаһа миигин аһара сөхтөрөрө. Табаарыстара-атастара элбэх буолааччы, күүстээх баскетболист, волейболист, оскуолатын, култуура хамаандатын чилиэнэ буолааччы. Дьиэтигэр бүгүрү, асчыта, ырааһа бөҕө, сатаабата диэн суох буолааччы.
Иккис уол Саша – Александр Иванович ийэтин солбуйбут директоры Карачкова Л.Н. хаһаайыстыбаннай үлэҕэ солбуйан, Людмила Николаевна, өр сылларга коллективы таһаарыылаахтык солбуйарыгар – улахан төһүү буолбута, ким да мөккүспэтэ буолуо.
Оҕо бибилэтиэкэтин дьиэтин, бибилэтиэкэ салҕааһынын тутуута, ис-тас үлэтэ, котельнайа, сантехниката, сылын аайы ыытыллар ремона, тэрилтэтигэр тиксэр эргэ массыынатын ремона, куораттан саҥа кинигэни, малын-салын аҕалааһына, сайыны быһа бүппэт субботниктара, коллектив сынньалаҥа, эппиэтинэстээх үлэтиттэн арахсыбакка – түбүктээх үлэтэ түмүктээх бүтэллэрин ситиһиитэ барыта Саша – Александр Иванович салайыытынан ситиһиллэрэ.
Иккиэннэрин кытта отучча сыл бииргэ үлэлээбитим тухары убаастабыллаахтык, аҕа табаарыстарын курдук сыһыаннарын истиҥник саныыбын.
Умнубаппын библиотека кур ыраас, сылаасбуолан ааҕааччыны кинигэнэн билиилэрин-көрүүлэрин хаҥаттаран духуобунай өттүнэн сайдалларыгар көмө-тирэх буолбуттарын.
Лидия Александровна этэрэ: « Бибилэтиэкэ – ааҕар балаҕан, Бибилэтиэкэ баайа – ааҕааччы уонна кинигэ, Бибилэтиэкэ – духуобунас, билии-көрүү киинэ » — диэн үлэбитин салайан, иитэлээн таһаарбыта, тус бэйэм үлэбин сирдээбитэ.
Светлана Даниловна Александрова, Ньурба бибилэтиэкэтин бэтэрээнэ.
