От ыйын 30 күнүгэр, В.А.Петрова аатынан  Ньурбатааҕы улуустар икки ардыларынааҕы кырдьаҕастар, инбэлииттэр интэринээт-дьиэлэригэр Ф.Г. Сафронов аатынан киин бибилэтиэкэ үлэһиттэрэ Максимова Ю.А., Софронова Е.И.  көһө сылдьар ааҕар саала үлэтин ыыттылар.

Олохтоохтор «Ньурба» хаһыат сонуннартан доргуччу ааҕыыны истэ олорон, «Ньурбаҕа тутуу миниистирэ эбийиэктэр тутуллуларын хонтуруоллаата» ыстатыйаҕа  ДИПИ туһунан:“Прораб Аман Максимов үлэ хаамыытын туһунан дакылааттаата. Эбийиэк бэлэм буолуута – 40% кэриҥэ. Тутааччылар үлэлэрин алтынньыга бүтэрэргэ былаанныыллар.” — диэни истээт, үөрэн өрө суугунаһа түстүлэр. 

«… Ол эрээри утуйа илик киһи, быһыыта, син баар эбит: сайылык арҕаа уһугар тиил оҕуруоттаах икки ыалтан илин диэкититтэн биир киһи, сонун сөрүү туттан, аргыый бэдьээлээн хааман, оҕуруоту тахсан, туос түннүгэ туртайан көстөр балаҕаҥҥа, халҕанын тыаһаппакка, сэрэнэн үктээн, киирэн кэллэ. Көрдөххө, туус маҥан баттахтаах, кыра уҥуохтаах, бэрт диэн нарын, хайдах эрэ сырдыкка дылы сэбэрэлээх, кыра соҕус ньохчоҕор, быллаллыбыт уостаах, мыччыллыбыт сирэйдээх, киһи таптыан курдук, Мыычаар диэн оҕонньор буолан биэрдэ. Киирэн, уҥа, сытар оронун диэки туллар-туллар, татыр-тутур хааман кэлбитигэр, бастаһа сытар Дьаллай диэн уол ыйытта: – Оҕонньоор, бу ханна сырыттыҥ?” –  олохтоохтор Суорун Омоллоон “Аанчык” кэпсээнин уу-чуумпуга иһийэн олорон иһиттилэр.

Түмүккэ  «Өс хоһооннору ситэр» оонньууга бары кыттан күө-дьаа буоллулар, минньигэс бириистэри тутан сэргэхсийдилэр. 

Ааҕааччыны кытта үлэлиир салаа.