Үйэлэри уҥуордаан кэлбит саха норуотун тылынан уустаан-ураннаан, тойук туойан үс дойду олоҕун кэпсиир героическай эпоһа олоҥхо 2005 с. Аан дойду барҕа баайа буолбута.

Норуот сүдү баайын олоҥхону уһуйаан оҕолоруттан саҕалаан үөрэтэн, үйэтитэр, сайыннарар үлэлэр бары араҥаҕа киэҥник ыытыллаллар.

Сэтинньи 25 күнүгэр Ф.Г.Сафронов аатынан улуустааҕы киин бибилэтиэкэҕэ сахалыы таба суруйууну сайыннарар, олоҥхо баай тылын-өһүн кэҥэтэр сыаллаах «Олоҥхо дьыктаана-2025» ыытылынна.

Манна 12 киһи кыттыыны ылла. Бурнашев Иннокентий Иванович — Тоҥ Суорун (1868—1945), Мэҥэ-Хаҥаластан төрүттээх олоҥхоһут, норуот ырыаһыта «Дыырай бухатыыр» олоҥхотуттан быһа тардыыны бибилэтиэкэ эрэллээх доҕоро, Ньурбатааҕы оҕо техниичэскэй дьоҕурун сайыннарар киин  методиһа, быйылгы «Ньурба күһүнэ-2025»  литературнай  фестивальга ыытыллыбыт «Чуору ааҕабыт!»  уус-уран ааҕыы чемпионатын уһулуччу кыайыылааҕа Марина Семеновна Егорова аахта.

Олоҥхо инникилээх буоллун уонна олоҕу кытта тэҥҥэ сайдан истиҥ!

Ааҕааччыны кытта үлэлиир салаа.