Саҥа бырайыак. Библиотекабыт иһинэн саҥардыы тэриллибит оҕолор ортолоругар сахалыы ааҕыыны тарҕатар Киин үлэтин чэрчитинэн Ньурбатааҕы алын сүһүөх оскуолатын 1-Б литэрэтиирэ хайысхалаах кылааһын кытары «Ааҕар оҕо» диэн саҥа бырайыакпыт бастакы тэрээһинэ ыытылынна.

Быйыл саха норуодунай суруйааччыта Н.Е. Мординов – Амма Аччыгыйа төрөөбүтэ 120 сыла бэлиэтэнэр. Онон сиэттэрэн «Тоҕус төгүл тоҕо?» кинигэтин билсиһииттэн саҕалаатыбыт. Оҕолор «Бастакы тоҕо?» кэпсээни истэн бараннар, сүрүн дьоруой Ваня тугу сыыспытын толкуйдаан ырытан бардылар.

Аҕам саастаах дьоммутугар харыстабыллаах, убаастабыллаах сыһыан туохтааҕар да наадатын өйдөөтүлэр. Үөрэнээччилэр саҥардыы ааҕарга үөрэнэ сылдьар буоланнар, эрчиллэ таарыйа, салгыы кырачаан кинигэлэри ылан аахтылар. Түмүккэ кинигэни рекламалыыр библиотека бырайыагынан уһуллубут Нутчина Алеся (ННОШ №3, 2 кыл.) видеотын көрдүлэр, олус сэҥээрдилэр. Мантан ылата бу кылаас оҕолорун, төрөппүттэрин кытары сахалыы ааҕыыга уһуйууга элбэх тэрээһиннэр ыытыллаллара былааннанар.

Төрөөбүт тылбыт сүппэтин уонна сахалыы ааҕыы сайдарын туһугар кырачааннарга улахан болҕомто ууруллара наадалаах. Күндү төрөппүттэр, эһиги оҕоҕут сахалыы ааҕарыгар баҕалаах буоллаххытына, биһиги библиотекабытыгар өрүү араас кинигэ, сурунаал уларсар кыахтааххытын санатабыт, барыгытын күүтэбит! Библиотекарь Ушканова Я.В.