Күн аайы саҥатык

Олохтон үөрүөххэ,

Күн аайы,

Сир аайы

Чахчыны көрдүөххэ.

Көрбүтү сонуннук,

Дириҥник өйдүөххэ

Күн аайы салпакка

Олоҕу таптыахха.

Семен Данилов

Бүгүн, олунньу 3 күнүгэр, В.А.Петрова аатынан  Ньурбатааҕы улуустар икки ардыларынааҕы кырдьаҕастар, инбэлииттэр интэринээт-дьиэлэригэр Ф.Г. Сафронов аатынан киин бибилэтиэкэттэн Софронова Е.И. ыалдьыттаата.

Улуу нуучча суруйааччыта, ХIХ-с үйэ биир чулуу сатирига, суруналыыс, судаарыстыбаннай диэйэтэл Михаил Евграфович Салтыков-Щедрин төрөөбүтэ 200 сылынан олохтоохторго кини олоҕун, айар үлэтин билиһиннэрдэ.

Иккис иһитиннэрии олунньу 2 күнүгэр Арассыыйа буойуннарын албан аатын күнэ буоларынан Сталинград кыргыһыытын 82 сылынан иккис аан дойду биир муҥутуу хаан тохтуулаах, улахан сүтүктээх сэриитин туһунан. Бу кэмҥэ «Хардыыны да чугуйума!» диэн кытаанах, суостаах дьаһал тахсыбыта биллэр. Икки өртүттэн 2 мөл. тахса киһи, 25 791 орудие уонна миномет, 2138 таанка, 2566 сөмөлүөт  утарыта турсубута. Бу үлүгэрдээх сэриигэ  ССРС уонна Германия 2 мөл. тахса киһитин сүтэрбитэ, олортон аҥара кэриэтэ суорума суолламмыттара. Олохтоохтор Ньурбаттан бу кыргыһыыга кыттыбыт дьон туһунан билсистилэр.

Бу хотторууттан саҕалаан фашистскай Германия кыайан өнүйбэтэҕэ, салгыы хотторор аакка барбыта. Онон Сталинград анныгар кыргыһыы – аан дойду устуоруйатыгар улахан дьайыылаах, уһулуччу суолталаах түгэнинэн буолбута.

Салгыы  «Ньурба» хаһыат сонуннарын ааҕыы буолла,  олохтоохтор олус интэриэһиргээн, сэргээн иһиттилэр.

Түмүккэ, кэлбит 2026 сыл Дьөһөгөй оҕотун сылынан салаллыбытынан, сылгы туһунан өс хоһооннору ситэрэр тургутукка олохтоохтор көхтөөхтүк кытыннылар.

Ааҕааччыны кытта үлэлиир салаа