Ньурбатааҕы кииннэммит бибилэтиэкэ ситимин иһинэн үлэлиир киэҥ историялаах «Ньурба уоттарын» быйылгы 55 сылын бэлиэтиир үбүлүөйдээх сылыгар Дьиикимдэттэн хоһоонньуппут Станислав Степанов-Хотоҕос 200 ахсаанынан тахсыбыт «ДЬИИКИМДЭБЭР, ЭЙИЭХЭ» бастакы кинигэтэ тахсан өрөгөй үөрүүнү хоточчу көтөҕөн киллэрдэ.
Станислав Степанов-Хотоҕос, саха киһитэ ханна да тиийдэр, төһө да киэҥ сиринэн тэлэһийдэр, киниэхэ төрөөбүт дойдутуттан ордук кэрэ, күндү, чугас туох да суоҕун, кута-сүрэ төрүт түөлбэтигэр мэлдьи тардыһарын сылаас, истиҥ тылларынан хоһуйбут хоһоонноро түмүллэн бастакы кинигэтэ күн сирин көрбүтүн, бар дьоҥҥо тиийэр, иһиллэр, ааҕыллар кыахтаммытын бэлиэтиир биһирэмэ дойдутугар Дьиикимдэҕэ олунньу 12 күнүгэр буолла.
Ньурбалар бастакы суруйааччыбыт, тумус туттар киһибит Степан Федотов дойдута Дьиикимдэ өссө биир талааннаах, айар-суруйар эр хоһуунунан эбиллибитэ биһиэхэ, ньурбаларга олус суолталаах. Дьиикимдэ Дьөттүнэ Ньурба сирин эрэ буолбакка бүтүн Саха сирин айар дьонун, суруйааччыларын түмэр сирбит буолар. СТЕПАН Федотов кэнниттэн 90 сыл буолан баран Дьиикимдэҕэ СТЕПАНОВ Станислав аата тахсыбытын дойдутун дьоно-сэргэтэ, Ньурба сирин литератураҕа сүгүрүйээччилэрэ, айар-суруйар дьоммут-сэргэбит уруйдуу көрүстүбүт.
Хотоҕос республикатааҕы эдэр хоһоонньуттар күрэхтэрин кыайыылааҕа буолан бу бастакы кинигэтэ, норуодунай суруйааччылар мэктиэлээСтанислав бу кинигэтэ тахсыытыгар күүскэ долгуйан туран үлэлэспит, киирии тылын суруйбут «Ньурба уоттарын» билиҥҥи үлэтин сүрүннэһээччи, кинигэ хомуйан оҥорооччу, СӨ учууталларын учуутала, СӨ үөрэҕириитин туйгуна, «Ньурба улууһун социальнай-экономическай сайдыытыгар кылаатын иһин» бэлиэлээх Луиза Акимовна Канаева.
Кинигэ киирии тылыгар Хотоҕос учуутала, «Ньурба уоттарын» 1970-80 сс. чилиэнэ, педагог, үлэ бэтэрээнэ эрдэ, Хотоҕос кинигэтэ хаһан эрэ тахсыаҕа, диэн эрэллээх суруйан хаалларбыт баҕа санаата киирбитэ олус долгутуулаах.
Дьиикимдэ норуот айымньытын дьиэтин улахан саалатын толору дьон сэргэ тоҕуоруһа мустубута тута бырааһынньык туругар киһини киллэрэр. Чаппандаттан «Куорсун» түмсүүлэри баһылыктара Бухолов К.Г. илдьэ кэлбит, ОДьКХ ГУТ Ньурбатааҕы филиалын кэлэктиибэ Профсоюз бэрэсэдээтэлэ Иннокентьев А. В, экономист Прокопьева А. О., «Ньурба уоттарыттан», Дьиикимдэ дьоно-сэргэтэ. Биһирэм олус сэргэхтик, үөрүүлээхтик икки чаас букатын биллибэккэ ааста. Дьиикимдэ эр дьоно күргүөмүнэн уолларын бастакы биһирэмин өйөөн ырыаларынан, Хотоҕос хоһооннорун ааҕыылара түмсүүлээхтэрин, биир долгуҥҥа сылдьалларын өссө төгүл бигэргэттэ. Инникитин өссө да айымньылара кинигэ буолан тахсалларыгар баҕа санаа бастыҥын мустубут дьон эдэр поэкка Станислав Степановка-Хотоҕоско анаатылар.
Эрэнэбит, Хотоҕос айар дьоҕура өссө күүһүрэн, үлэлиир кыаҕа өссө эбиллэн саха литературатыгар хотуулаахтык, эрчимнээхтик хааман киирэригэр!
Эрэнэбит, дьонун-сэргэтин итэҕэлэ, өбүгэлэрэ арчылааһыннара, дойдутун кыаҕа өрүү аттыгар баар буолуон!
Эрэнэбит, тапталлаах Ньурбабыт дорҕоонноох аатын чугаһынан-ырааҕынан иһитиннэрэригэр!
Ньурбатааҕы киин бибилэтиэкэ ааҕааччыны кытта үлэлиир салаата.
Олунньу 12 күнэ, 2026 сыл.
Ньурба-Дьиикимдэ.
