“Күүстээх буолуоххун баҕараҕын – сүүр, кыраһыабай буолуоххун баҕараҕын – сүүр, өйдөөх буолуоххун баҕараҕын – сүүр”. Бу дириҥ ис хоһоонноох тыллар Түҥ былыргы Элладаҕа үрдүк очуос тааска ойо быһыллан суруллан турбуттарын үһүйээн кэпсиир. Чахчы даҕаны, сүүрүү – былыр-былыргыттан кэлбит киһи этин-сиинин бөҕөргөтөр успуорт биир бастыҥ көрүҥэ буолар.
Бүгүн, олунньу 27 күнүгэр, Ньурба улууһугар спорт сылын уонна 2027 сылга буолаары турар IX Норуоттар оонньууларыгар бэлэмнэнии чэрчитинэн “Хайдах сүүрэн саҕалыыбын?” диэн ааттаах чөл олоххо көҕүлүүр сонун тэрээһин буолан ааста. Тэрийээччилэр: Оҕо уонна ыччат бибилэтиэкэтэ, Ф. Г. Сафронов аатынан Ньурбатааҕы Киин бибилэтиэкэ.
Бу көрсүһүүгэ сүүрүүнү доҕор оҥостубут Ньурбабыт кэрэ аҥаардара күндү ыалдьыт буоллулар. Кинилэр бары араас эйгэ үлэһиттэрэ, ыал мааны ийэлэрэ:
Улуус хонтуруоллуур уонна ааҕар-суоттуур палаататын үп-харчы, аудит өттүгэр экспердэ Светлана Степановна Никифорова,
Нюргустана Викторовна Иванова, улуустааҕы нолуок сулууспатын сүрүн судаарыстыбаннай инспектора,
Елена Аркадьевна Семенова, Кииннэммит бухгалтерия сүрүн испэсэлииһэ,
Сардаана Руслановна Егорова, нолуок сулууспатын инспектора,
уонна эдэр библиотекарь Юля Александровна Максимова.
Кинилэр сүүрүүнэн дьарыктаммыттара кимиэнэ эрэ биир сыл, кимиэнэ эрэ биэс сыл, онтон сорохторо оҕо сылдьан дьарыктанан баран, дьэ иккистээн бу успуорт көрүҥэр төннүбүттэр эбит. Ыалдьыттарбыт киһи этигэр-сиинигэр сүүрүү туох туһалааҕын, хайдах аан бастаан саҕалаабыттарын, аһылыктарын хайдах көрүнэллэрин олус интэриэһинэйдик кэпсээтилэр. Хас биирдиилэрэ туспа дьарыктанар систиэмэлээхтэр, сүрүннээн нэдиэлэҕэ үстэ сүүрэллэр. Бу кыргыттартан Юля уонна Нюргустана онлайн-тренер көмөтүнэн дьарыктаналларын сэргии иһиттибит. Тренердэрэ күннээҕи былааннарын ыйан-кэрдэн биэрэн ноҕуруускаларын хонтуруоллуур эбит. Онтон атыттар бэйэлэрин уопсай туруктарыттан көрөн, эттэрин-сииннэрин истэн, бэйэлэрин салайыналлара киһини кэрэхсэтэр. Сүүрүктэрбит бары ордук сөбүлээн сарсыарда күн тахсыыта пааркаҕа, трассаҕа тахсалларын эттилэр. Билигин сүүрүүтэ суох олохторун сатаан санаабаттарын бэлиэтээтилэр.
Тэрээһин ортото Елена мустубут дьоҥҥо бэйэтэ сүүрүөн иннинэ сөбүлээн оҥорор эрчиллиилэрин көрдөрдө. Онон бары кинини үтүктэн араас хамнаныылары оҥороммут, көһүйбүппүт ааста, настарыанньа өссө тубуста.
Сүүрүөн баҕалаах дьоҥҥо кыргыттар бастыҥ сүбэлэрин истэн, сөптөөх таҥас-сап хайдах талары, бэйэни хайдах көҕүлүүрү билэн, чахчы да киһи эрэ дьарыктаныах санаата үксүбүтүгэр үөскээтэ. Сыллата араас куораттарга ыытыллар марафоннар тустарынан сиһилии Светлана киэҥ ис хоһоонноох кэпсээниттэн биллибит. Ким ханнык марафоннарга кыттыбытын хаартысканан көрөн-истэн сэргии олордубут.
Бу маннык биир санаалаах, олоххо дьулуурдаах дьон аттыбытыгар баарыттан киһи эрэ үөрэр. Кинилэртэн холобур оҥостон, сааһыттан тутулуга суох ким баҕарар сүүрэн, доруобуйаны тупсарынар, бэйэтин тус олоҕун байытар кыахтанар. Онон барыгытын чөл олоҕу тутуһарга, успуордунан дьарыктанарга ыҥырабыт.
Уонна бүгүҥҥү тэрээһиммит аатыгар сүүрүүктэр эппит тылларын тоһоҕолоон этиэҕи баҕарыллар: “Саамай сүрүнэ бэйэни кыайыы, оччоҕо сүүрүөҥ-көтүөҥ, тугу баҕарар ситиһиэҥ!”.
Бибилэтиэкэр Ушканова Я.В.
