Кулун тутар 5 күнүгэр, Аан дойду дьахталларын күнүн көрсө, саас саҥа саҕаланыытын, айылҕа уһуктуутун кытары дьүөрэлээн, ураты суолталаах түмсүүлэр икки ардыларыгар «Өркөн өй» өй-билии күрэҕэ буолан ааста. Уопсайа 3 хамаанда күөн күрэстэ, «Ситим» эдэр ыччат түмсүүтэ, «Ньургуһун» Ийэлэр түмсүүлэрэ, «Иэйиэхситтэр» Аҕам саастаахтар түмсүүлэрэ.

Тэрээһин боппуруостара кэрэ аҥаардарбыт билииллээх Далбар хотуттары, саха суруйааччыларын, сахалыы сиэр-майгы уонна бириэмэ кээмэйин төһө билэллэригэр ананна.

Күрэх түмүгүнэн “Ньургуһун” түмсүү элбэх баалынан өрө тахсан кыайыылаах буолла, “Иэйиэхситтэр” иккис миэстэҕэ таҕыстылар, “Ситим” түмсүү 10 баалынан тиийбэккэ бочуоттаах үһүс миэстэ буоллулар.

Тэрээһин түмүгэр хас биирдии кыттааччыга туоһу сурук туттарылынна, туйгуннар анал суругунан бэлиэтэннилэр. Кыайыылаах хамаандаҕа өссө төгүл эҕэрдэбитин тиэрдэбит.