Муус устар 1-5 күннэригэр Мэҥэдьэк нэһилиэгин 26 киһилээх делегацията Мирнэй оройуонугар бара сырытта. 2026 сылы Мэҥэдьэк аҕа баһылыга Ыччат сылынан биллэрбитинэн, кэнчээри ыччаты, оскуола саастаах оҕолору промышленноһы, АЛРОСА курдук улахан хампаанньаны кытта уонна Сүлдьүкээртэн сыдьааннаах, төрүттээх-уустаах дьону төрүччүлэрин, өбүгэлэрин сирин кытта билиһиннэрэ диэн сүрүн сыаллаах бэртээхэй айан буолла. Мирнэй оройуонугар киирээт аан дойдуга биллэр «Мир» туруупкаҕа сырыттыбыт, онтон Чернышевскай бөһүөлэгэр айаннаатыбыт. 3 тыһ. тахса киһилээх куораттыы тииптээх бөһүөлэк аҕа баһылыга Л.Л.Жалсараев көрсөн, Чернышевскайдааҕы балык собуотугар сырытыннарда, ГРЭС-кэ, сынньалаҥ турбазаларыгар, 3 N-дээх оскуолаҕа, өрөспүүбүлүкэҕэ иккис кадетскай оскуолаҕа — Чернышевскайдааҕы Г.Н.Трошев аатынан кадетскай оскуола-интернакка, эбии дьарыктааһын киинигэр, түмэлгэ экскурсиялатта. Чернышевскай бөһүөлэгин, ГЭС-ин төрүттээбит Е.Н.Батенчук аатынан киэн туттан, убаастаан, хас оскуола, уһуйаан аайы кини үрдүк аата стендэлэргэ, оҥорбут үлэтэ макет, бырайыак, быыстапка быһыытынан хараллан турара, киниэхэ анаан түмэл тэрийбиттэрэ киһини сөхтөрдө. Чернышевскайга эбии дьарыктааһын киинигэр сылдьан, олус астынныбыт, сөхтүбүт-махтайдыбыт. Култуура киинэ эбии үөрэхтээһини кытта холбоһон, олус бэркэ үлэлии олороллор эбит. Уопсайынан, Мирнэй оройуонугар оҕо-ыччат бириэмэтин туһалаахтык атаарарыгар, эбии дьарыктааһыҥҥа улахан болҕомто ууруллар, спорт комплекстара да элбэхтэрэ ону туоһулуур эбит. Бу Эбии үөрэхтээһин киинигэр оҕо талбыт куруһуогар, дьарыгар босхо сылдьар кыахтаах. Уруһуйтан саҕалаан, английскай тылы үөрэтии, математикаҕа эбии дьарык, театр, киинэ устуудьуйата, ырыа, үҥкүү, илии оҥоһуктарын оҥорор, парикмахер буоларга үөрэтэр, биологическай куруһуоктар баһаамнар эбит. Кэнчээри ыччат сайдыылаах, билиилээх, ситиһиилээх буоларыгар акылаат бэккэ оҥоһуллар эбит. Киэһэ Чернышевскай «Каскад» хамаандатын кытта Мэҥэдьэк ыччата волейболга күрэхтэстэ, бассейыҥҥа, катокка сырытта. Икки күммүт биллибэккэ ааста. Мирнэй куоракка төттөрү төннөн кэлэн, АЛРОСА хампаанньа генеральнай директорын солбуйааччытын Алексей Прокопьевич Дьячковскайы кытта көрсүһүү буолла. Ыччаттарга, оҕолорго туһалаах профориентационнай бэсиэдэ, промышленность уонна ол эйгэ үлэһитин, олоххо киһи сыалын хайдах ситиһиэхтээҕин туһунан тренинг ыытта. Алексей Прокопьевич сүбэтэ-амата ыччаттарбытыгар инники сыалларын, суолларын таба тайаналларыгар улахан оруолу, кылааты хаалларыа диэн эрэнэбит. Салгыы АЛРОСА хампаанньа «Интернационал» руднигар сылдьар чиэскэ тигистибит. Манна үлэһиттэр үлэлэригэр хайдах кэлэллэриттэн саҕалаан, мед-хамыыһыйаны, бэрэбиэркэни ааһан, таҥас-сап, экипировка ылан, шахтаҕа киирэллэрин барытын олус үчүгэйдик, өйдөнөр гына кэпсээтилэр. Шахтер, машинист, контролер диэн наадалаах, эппиэтинэстээх идэлэри кытта билистилэр, уу харахтарынан көрдүлэр. Хомойуох иһин, шахтаҕа киллэрбэтилэр, ол да буоллар, накопительнайга киирэ сылдьан, шахта үлэтин сэгэтэн көрдөрбүттэригэр оҕолорбут олус астыннылар да, салыннылар да. Салгыы хаан-уруу тардыһа, өбүгэлэрин сирдэрин кытта билсиһэ эбэҥкилэр олорор Сүлдьүкээр сэлиэнньэтигэр айаннаатыбыт. Бу сырыыбытыгар Сүлдьүкээртэн төрүттээх- уустаах эбэлэрбитин, оҕолору илдьэ сырыттыбыт. Төһө да хойут тиийбиппитин үрдүнэн, эбэҥкилэр абыычайдарынан уот оттон, ыраастаан, чиркан аннынан аһардан олус сылаастык, истиҥник көрүстүлэр. Ааспыт сырыыга Сүлдьүкээрдэр Хатыыга кэлэ сылдьыбыттара, ол ыҥырыыларын ылынан, аҕа баһылыкпыт делегация тэрийэн, нэһилиэк олохтоохторун илдьибитэ хайҕаллаах дьыала. Сүлдьүкээр бэлиэ сирдэринэн сырытыннаран, пааматынньыктарын, оскуолаларын, уһуйааннарын көрдөрөн, оскуола оҕолоругар, улахан дьоҥҥо эбэҥки оонньууларын оонньотон сэргэхситтилэр. Уһуйааҥҥа да, оскуолаҕа, библиотекаҕа эбэҥки норуотун туһунан түмэл, быыстапкалара баара биһигини кэрэхсэттэ. Эбэҥкилэр туттар малларын, оһуордарын, култуураларын, сиэри-туому, эбэҥки тылын үйэтитиигэ, сөргүтүүгэ кэнчээри ыччаттарыгар тиэрдэр үгүс үлэ бара турар эбит. Мэҥэдьэктэр бэйэбит өттүбүтүттэн биллэр дьоммут туһунан библиотекарь Габышева М.Г. быыстапка туруоран, талааннаах эдэр ыччаттарбыт кэнсиэринэн эҕэрдэлээн, доҕордоһуу саламатын ыйаатыбыт. Бу тэрээһиммитигэр күүс-көмө буолбут Мэҥэдьэк нэһилиэгин олохтоохторун, актив, делегация аатыттан махтаныах этибит Ил Түмэн бэрэссэдээтэлин солбуйааччытыгар Ю.М.Николаевка, депутаппытыгар В.М.Прокопьевка, АЛРОСА хампаанньа гендиректорын солбуйааччыта А.П.Дьячковскайга, Сүлдьүкээр баһылыга В.Ф.Афанасьеваҕа, барытын сүүрэн-көтөн, кэпсэтии ыытан, биһигини кытта тэҥҥэ сылдьыбыт тутаах киһибитигэр — Мэҥэдьэк нэһилиэгин аҕа баһылыга Л.А.Николаевка, сымнаҕас олбохтоох, түргэн-сыыдам көлөлөөх таксист уолаттарбытыгар Д.Г.Ксенофонтовка, В.Н.Васильевка. Халлааммыт да туран биэрэн, сырыыбыт бэркэ сатанна, ыччаттарбытыгар, дьоммутугар умнуллубат айан, ааспыт ааспат амтана, дьоллоох түгэн буолан өйдөрүгэр-санааларыгар хаалыахтын.
Матрена Габышева, Мэҥэдьэк.
