Библиотека кинигэ эрэ биэрэр, быыстапка эрэ оҥорор тэрилтэ буолбатах. Библиотека өссө нэһилиэк дьонун сайдар киинэ, сааһыттан тутулуга суох араас тэрээһиннэр ыытыллар сирдэрэ буолар. Бу соторутааҕыта  “Сарыал” уһуйааҥҥа олохтоох библиотека үлэһитэ Габышева М.Г. “Семейные нейроигры” диэн ааттаах уһуйаан төрөппүттэригэр,  оҕолоругар тэрээһин ыытта.  Аныгы сайдыылаах олоххо бириэмэ тиийбэтинэн төрөппүт оҕотун кытта алтыһара, кэпсэтэрэ, оонньуура олус аҕыйаата. Онон да буолуо, саҥарбат, дьону кытта сатаан кэпсэппэт, оҕолордуун сатаан оонньообот оҕо күннэтэ элбээн иһэрэ баар суол.  Билиҥҥи олоххо нейро оонньуулар оҕо сайдарыгар олус көмөлөөхтөрүн, туһалаахтарын туһунан библиотекарь төрөппүттэргэ тренинг ыытта. Оҕо саҥарар дьоҕуругар, болҕомтолоох буолууга, өй, мэйии үлэтигэр, сайдыытыгар дьиэҕэ төрөппүттэр ханнык оонньуулары оҕолорун кытта оонньуохтарын сөбүн, ханнык оонньуу туохха туһалааҕын, көмөлөөҕүн кэпсии-кэпсии, төрөппүттэри оҕолорун кытта оонньотто. Киһи үөрүөх, олус элбэх төрөппүт кэлэн кыттыыны ылла, ол аата төрөппүттэр оҕолоро сайдалларыгар кыһаллалларын бэлиэтэ буоллаҕа дии. Бу тэрээһинтэн нейро оонньуу ньымаларын, араастарын, боростуойдук ханнык оонньуурдары  (из подручных средств) оҥостуохха сөбүн биллилэр, көрдүлэр, оонньоотулар. Оҕолор төрөппүттэрин кытта оонньоон астыннылар, төрөппүттэр элбэх саҥаны билэн, махтал тылларын этэн тарҕастылар.

Матрена Габышева, Мэҥэдьэк