Оҕо кинигэтин нэдиэлэтин 11 нүөмэрдээх библиотека “Айар” кинигэ кыһатын оҕолорго аналлаах 100 кинигэ быыстапкатынан арыйда. Сахалыы тылынан хоһооннор, кэпсээннэр, дьэрэкээн ойуулаах оҕо кинигэлэрэ дьон болҕомтотун тарта. Ол курдук нэдиэлэ устата араас тэрээһиннэр ыытылыннылар. Аан дойдуга театр күнүнэн «Сарыал” уһуйааҥҥа нуучча улуу “Колобок”, “Курочка ряба” остуоруйаларынан куукула тыйаатыра буолла. Уопсайа 10 кырачаан иитиллээччи иһиттэ, астына-дуоһуйа көрдө. Хаты орто оскуолатын алын сүһүөх оҕолоругар «Айар» кинигэ кыһатын оҕолорго аналлаах кинигэлэрин рекаламата, ааҕыыга көҕүлээһин тэрээһинэ ыытылынна. Барыта 30 оҕо кыттыыны ылла. Араас 2Д, 3Д кинигэлэринэн оҕолор болҕомтолорун тардан, таабырын таайсан, остуоруйа геройдарын ыйыталаһан бэртээхэй көрсүһүү буолла. Оскуола улахан саастаах оҕолоругар «Таабырын күнэ» ыытылынна. Манна 5-11 кылаас үөрэнээччилэрэ 16 оҕо кыттыыны ылла. Түмүккэ, саамай элбэх таабырын таайан, 11 кылаас үөрэнээччитэ Сидоров Айтал минньигэс бириис тутта. Бу күн «Сарыал» уһуйаан улахан бөлөҕүн оҕолоро «Бөрө» кэпсээни иһиттилэр, сур бөрө адьырҕа буоларын быһыытынан майгытын, бу кэпсээҥҥэ туох үчүгэй, куһаҕан быһыыны оҥорбутун ырытыстылар, кинигэни олус интэриэһиргээн былдьаһа-былдьаһа көрдүлэр. Кулун тутар 30 күнүгэр оскуолаҕа «Кроссворд күнэ» ыытылынна. Сахалыы кроссворду сэҥээрэр, интэриэһиргиир оҕолор мустан, дьиэ кыылларын, айылҕа туһунан араас кроссвортары таайдылар, өйдөрүн сытыылаатылар. Түмүккэ, Аммосова Тапталина уонна Сидоров Мирон кыайыылаах таҕыстылар. Бу күн «Сарыал» уһуйаан иитиллээччилэригэр 11 нүөмэрдээх библиотекаҕа «Уопут күнэ» тэрилиннэ. А.П.Шестакова «Дьиктилээх физика» кинигэтиттэн оҕолорго анаан «Тимирбэт булавка», «Тэстибэт шарик» опыттар көрдөрүлүннүлэр, оҕолор олус сэҥээрэн, бэйэлэрэ опыты баһылаан, үтүктэн, оҥорон астынан тарҕастылар. Кулун тутар 31 күнүгэр библиотекаҕа «Игротека в библиотеке» тэрээһиҥҥэ 16 эдэр ааҕааччы кыттыыны ылла. Таабырын таайсан, ребус оҥорон, остуол оонньууларын оонньоон, кинигэ рекламалаан, күрэхтэһэн, бириэмэ биллибэккэ ааста. Түмүккэ «Бастыҥ ребус таайааччы» –Аммосов Арылхан, «Бастыҥ таабырын таайааччы» – Ксенофонтов Мичил, «Тыл оонньуутугар бастыҥ» — Тимофеева Уйгулаана. Сахалыы остуол оонньуутун кыайыылааҕа — Ксенофонтов Дьулуур, кыргыттарга — Кычкина Айна. «Саамай бастыҥ кинигэ рекаламатын ыытааччылар» — Аммосов Арылхан, Кычкин Лев, Павлова Аделина, Яковлева Сандаара, Ковальчук Андрей буоллулар. Оҕолор сааскы каникулларын туһалаахтык атаардылар. Библиотека тэрээһиннэригэр каникулларыгар эбээлэригэр сынньана кэлбит оҕолор ыалдьыт, кыттааччы быһыытынан кэлбиттэрэ олус үөрдэр.
Матрена Габышева, Мэҥэдьэк
