Олохтоох салайыныы күнүгэр анаан, Чуукаар нэһилиэгэр бэрт сэргэх тэрээһин буолан ааста. Чуукаар нэһилиэгин Сэбиэтин дьокутааттара, нэһилиэк олохтоохторо уонна үрдүкү кылаас оҕолоро кыттыылаах «Нэһилиэгим сайдар кэскилэ» төгүрүк остуол ыытылынна. Ыҥырыылаах ыалдьыттар олохтоох салайыныы туһунан оҕолорго олус өйдөнүмтүөтүк быһааран биэрдилэр, үлэлэрин ис хоһоонун кэпсээн сэҥээриини ыллылар. Ол курдук, истээччилэр интэриэһиргээн араас ыйытыылары биэрдилэр. Салгыы нэһилиэк историятыттан «Чуукаарым сайдыытын кэрчиктэрэ» интеллектуальнай оонньуу ыытылынна. Тэрээһини олохтоох бибилэтиэкэ үлэһитэ Клавдия Владимировна Андреева иилээн-саҕалаан ыытта. Бу тэрээһиҥҥэ кыттыбыт дьокутааттарбытыгар, нэһилиэк олохтоохторугар, оскуола үөрэнээччилэригэр махталбын тиэрдэбин. Нэһилиэкпит чэчирии сайдарын туһугар таһаарыылаах үлэни, хас биирдии киһи олоҕор дьолу-соргуну! Бары бииргэ түмсэн, сомоҕолоһон үлэлиэххэ.

Клавдия Андреева