Ыам ыйын 13 күнэ – Сахалартан бастакы поэтесса, биир дойдулаахпыт Варвара Потапова төрөөбүт күнэ уонна Ньурбаҕа Поэзия күнэ биллэриллэн, оройуоммут библиотекаларыгар, нэһилиэктэргэ араас хабааннаах тэрээһиннэр ыытылыннылар.

Ол курдук Мэҥэдьэк библиотекатыгар «Ойдом үүммүт со5отох хахыйах» литературнай биэчэр буолла. Варвара Потапова кылгас эрээри чаҕылхай олоҕун, үлэтин туһунан кылгас видеолары, презентация, быыстапка  көрдүлэр.

 Кэлбит ыалдьыттар поэт айбыт ураты философскай хоһооннорун, иэйиилээх эрээри кутурҕан санньыардаах хоһооннорун иһиттилэр. Көҥүлэ суох кэм көҥүл поэта буолан, Варвара Потапова литература эйгэтигэр бэйэтин ураты суолун хаалларбытын кэпсэттибит, кэлэр кэнчээри ыччакка кэриэс гынан хаалларбыт хоһооннорун ырыттыбыт. Кыттыыны ыллылар  “Утум” аҕа саастаахтар чилиэттэрэ, оскуола оҕолоро, учууталлар. Дьон Поэзия киэһэтин астынан, биир дойдулаахтарын В.Н.Потапова туһунан элбэх саҥаны билэн, хоһооннорун  истэн, астынан тарҕастылар.

Матрена Габышева, Мэҥэдьэк