Ыам ыйын 13 күнүгэр, саха бастакы поэтессата, умсулҕаннаах уран тыл ууһа Варвара Николаевна Потапова төрөөбүтэ 80 сылын туолла. Оройуоммут аҕа баһылыгын ыйааҕынан, Ньурба оройуонугар сылын аайы Варвара Потапова төрөөбүт күнүгэр, Поэзия күнүн бэлиэтиир буолбуппут икки бүк үөрүүлээх буолла!

Бу бэлиэ күҥҥэ Аканаҕа «Үөрэхтээһин+култуура» бырайыак чэрчитинэн 8-10 кылаас кыргыттарыгар «Мин да оҕо этим…» диэн Варвара Потапова хоһооннорун хоһоонноохтук ааҕыы чөмпүйэнээтэ ыытылынна.

Тэрээһин саҕаланыытыгар В.Н.Николаев-Куххата аатынан олохтоох бибилэтиэкэ бибилэтиэкэрэ Павлова В.Л. Варвара Потапова «Мин сибэкки буолбатахпын» кинигэ быыстапкатын, олоҕун кэрчиктэрин билиһиннэрдэ.

Саха тылын учууталлара Васильева Н.В., Сергеева У.Н. В.Потапова хоһооннорун, М.Н.Петрова-Тойуктаах Марыына аатынан култуура киинин уус-уран салайааччыта Саввинова Е.Е. хоһоннорун нууччалыы тылбаастарын аахтылар. Чөмпүйэнээт бастакы түһүмэҕэр кыргыттар бары «Мин да оҕо этим…» хоһоонун аахтылар. Иккис түһүмэххэ хаалбыт 6 кыыс 6 араас хоһоону ааҕан бастыҥтан бастыҥ ааҕааччы буолар иһин кииристилэр. Дьүүллүүр сүбэ кыргыттар тыллара-өстөрө чуолкайын, куолас оонньооһунун, ааҕыы иэйиитин сыаналаата. Күрэх түмүгүнэн 1 үрдэли 10 кылаас үөрэнээччитэ Вера Жиркова ылла. 2 үрдэли – Акимова Айгылаана, 8 кылаас, 3 үрдэли – Иванова Саина, 9 кылаас.

Кыайыылаахтар добун суругунан, саха бэйиэт кыргыттарын кинигэлэринэн наҕараадаланнылар. Саха талааннаах поэтессатын Варвара Потапова хомоҕой хоһоонноро ааҕылла турдуннар!