Ыам ыйын 18 күнүгэр Хаҥалас нэһилиэгэр Варвара Потапова төрөөбүтэ 80 сылыгар аналлаах тэрээһин буолла Ыам ыйын 18 күнүгэр Хаҥалас нэһилиэгин «Алаас Хотуна» эбээлэр түмсүүлэрэ саха биллиилээх поэтессата, иэйиилээх хоһоон ааптара Варвара Потапова төрөөбүтэ 80 сылыгар аналлаах литературнай киэһэҕэ кыттыыны ыллылар.

Тэрээһин кэмигэр түмсүү кыттыылаахтара Варвара Потапова хоһоонноруттан быһа тардан, уус-ураннык, иэйиилээхтик, истиҥник аахтылар. Хас биирдии эбээ поэтесса тылларын ураты иэйиилээхтик, дууһатын ууран туран ааҕан, мустубут дьон кутун-сүрүн долгутта, айар куттаах дьоммутугар сүгүрүйүү, махтал тыынын иҥэрдэ.

Бу тэрээһин — төрөөбүт тылбыт сүмэтин, саха литературатын үйэтитиигэ, эдэр көлүөнэҕэ тиэрдиигэ биир дьоһун хардыы буолар. Күндү эбээлэрбитигэр куруук маннык көхтөөх, үөрэ-көтө сылдьаргытыгар, төрөөбүт тылбытын, үгэстэрбитин ыччакка тиэрдэр үлэҕитигэр ситиһиилэри, чэгиэн доруобуйаны баҕарабыт!

Анжелика Васильева