От ыйын 8 күнүгэр — дойдубут Президенин уурааҕынан 2022 сылтан ыла «Дьиэ кэргэн, таптал уонна бэриниилээх буолуу күнэ» бэлиэтэнэр үтүө бырааһынньык. Бу күн дьиэ кэргэн сыаннастарын, тапталы уонна бэйэ-бэйэҕэ эрэллээх буолууну өрө тутабыт.
 
Оҕо уонна ыччат библиотекатын иһинэн саҕаламмыт «Кыыс, дьахтар, ийэ анала туохханый?» диэн саҥа бырайыак бу бэлиэ күнү көрсө ураты хабааннаах тэрээһини ыытта. Бу бырайыак сыала-соруга — дьахтар дьоҥҥо-сэргэҕэ туох суолталааҕын, ийэ, кэргэн, үлэһит быһыытынан кини күннээҕи олоҕун, дьоҕурун уонна ис кыаҕын арыйыы буолар.

Санатан эттэххэ, бастакы тэрээһиммитигэр, кулун тутар ыйга, биһиги дьоруойбут, А.Н. Григорьев-Тута кэргэнэ Октябрина Дмитриевна ыалдьыттаан, ыал ийэтин, дьиэ кэргэн тирэҕин туһунан дириҥ ис хоһоонноох кэпсэтии бэлэхтээбитэ.

Бырайыак иккис ыалдьытынан элбэх сатабыллаах биир дойдулаахпыт — спортсменка, блогер, ырыаһыт, стендапер, пранкер уонна эдэр ийэ Анастасия Меркурьевна Обоева буолла. Кини — эдэр эрчимнээх, күүстээх санаалаах, олоххо көхтөөх эдэр ийэ холобура.

Тэрээһин сүрүн сыала — Анастасияны киэҥ эйгэҕэ, дьиэ кэргэн иһигэр ийэ быһыытынан, оҕотун иитиигэ хайдах курдук болҕомтолоохтук сыһыаннаһарын арыйыы буолла. Кини биэчэр тухары  бэрт сэргэхтик араас ыйытыыларга эппиэттээн, көрөөччүлэр болҕомтолорун уонна интэриэһин тарта. Ыалдьыттар Анастасия олоҕун, үлэтин уонна дьиэ кэргэнин туһунан элбэх ыйытыктары биэрэн, сэргэх кэпсэтии таҕыста.
Биэчэр олус истиҥ, алыптаах эйгэҕэ ааста. Анастасия бэйэтин сурутааччыларын (подписчиктарын) кытта атах тэпсэн олорон, олоххо көрүүтүн, ийэ буолуу дьолун, үлэтигэр уонна дьиэ кэргэнигэр хайдах сөпкө дьүөрэлэһэрин туһунан кэпсээбитэ. Маннык көрсүһүүлэр эдэр ыччат түмсэригэр, дьиэ кэргэн сыаннаһын өйдүүллэригэр уонна бэйэлэрин дьоҕурдарын арыйалларыгар улахан суолталаах.

Библиотека коллектива Анастасияҕа махталбытын тиэрдэбит уонна бу кэрэ бырайыак салгыы ситиһиилээхтик салҕана турарыгар эрэнэбит.