Үөрбүт киһи сирэйин саҕа үчүгэй суох дииллэрэ кырдьык ээ: үөрүү эмэни даҕаны эдэригэр эргитэр буоллаҕа.
Леонид Попов
Ол курдук от ыйын күнүгэр В.А.Петрова аатынан Ньурбатааҕы кырдьаҕастар уонна инбэлииттэр интэринээт дьиэтигэр «Ааҕар балаҕан сонуннара» көһө сылдьар ааҕар саала үлэһиттэрэ ыалдьыттаатыбыт, олохтоохтор үөрбүттэриттэн бэйэбит дьоллоннубут.
Ньурба улууһугар оттооһун үлэтин, тыаларга туох үлэ барарын билиһиннэрэн оройуоннааҕы «Ньурба» хаһыаты доргуччу ааҕыы буолла.
Гаврил Григорьевич Вешников-Баал Хабырыыс олоҕун туһунан «Дьылҕа дьикти бэлэҕэ»ыстатыйаттан (Валентина Семенова, Ефросинья Ноговицына «Дьылҕа дьикти бэлэҕэ».-Ньурба хаһыат.-2026 сыл.-От ыйын 23 к.-с.8-9) кэпсээтибит:
Саха талааннаах бэйиэтэ Гавриил Григорьевич Вешников-Баал Хабырыыс уон саастааҕар ийэтэ өлөн тулаайах үөскээбит, бэрт эрдэттэн сэллик ыарыыга быһа эмтэрбит ыарыһах киһи этэ. Хаартыскаларын көрдөххө, суруйааччы – кыыс-дьахтар хараҕа иҥниэ суох уҥуох сула, хатыҥыр, хаччаҕай төбөлөөх, бэрт эрдэттэн сааһыра барбыт көрүҥнээх. Аны сааһын тухары бас билэр дьиэтэ-уота, олорор хоһо суох буолан, бииргэ төрөөбүт убайдарыгар кыбыллан олороро. Эдэр сылдьан учуутал техникумун бүтэрэн, Чурапчыга үлэлии сылдьан, биир кэрэ кыыһы сөбүлүү көрөн, сүрэҕэ таптал уотунан умайбыт да, кыыс кини иэйиитигэр хардарбакка хомоппут. Гавриил Григорьевич ыарыһах буолан, санаторий, куруорт бөҕөтүн кэрийээхтээбит даҕаны, үтүөрбэтэх. «Куһаҕан үчүгэйэ суох буолбат» дииллэригэр дылы, биир санаторийга нуучча биллэр бэйиэтэ Н.И. Глазков ийэтин кытары биир кэмҥэ сөп түбэсиһэн эмтэммиттэр. Онон Баал Хабырыыс ийэтин көрсө кэлэр Николай Глазкову кытары онно билсэн доҕордоспут. Николай Иванович кэргэнэ Росина Моисеевна керамист худуоһунньук идэлээҕэ. Оттон кини чугас дьүөгэтэ – биир идэлээҕэ, скульптор Ольга Степановна Скубченко этэ. Онон Глазковтар доҕотторун билиһиннэрбиттэр уонна ыал буоларга сүбэлээбиттэр.
Салгыы Юлия Александровна “Айар” кинигэ кыһата таһаарбыт оонньууларын олохтоохтору бириэмэҕэ онньоттон күрэхтэһиннэрдэ, тургутугу ыытта. Үөһээ-Бүлүүттэн төрүттээх Стас ырыатынан олохтоохтор үҥкүүлээтилэр.
Ф.Г. Сафронов аатынан киин бибилэтиэкэ ааҕааччыны кытта үлэлиир салаата.
