Маардааҕы кииннэммит бибилэтиэкэ сайыҥҥы “Сахалыы ааҕабын, суруйабын” диэн куруһуогун үлэтин үрдүк таһымҥа түмүктээтэ. Билигин оҕолор күһүҥҥү оскуолаҕа бэлэмнэниилэрэ саҕаланнылар.

Бибилэтиэкэ үлэһиттэрин элбэх сыратын уонна кыһамньытын түмүгүнэн, куруһуокка сылдьыбыт оҕолор саха тылыгар эбии билиини ыллылар, саҥа доҕоттордонон, аралдьыйан кэллэхтэринэ кинилэр төрөппүттэрэ даҕаны үөрэллэрин биллэрдилэр.

Ол курдук, куораттан төрөппүт Лия Тимофеева маннык суруйар: “Сайын оҕом эһиги куруһуоккутугар сылдьан астынан кэлбитэ. Остуол оонньууларын сэҥээрэн “Айар” кинигэ кыһатыттан остуол оонньууларын ылларда. Биһиги ыал дьиэбитигэр нууччалыы кэпсэтэрбит кистэл буолбатах, оҕобут куруһуоктан кэлэн «махтанабын», «үтүө сарсыарданнан», «көрсүөххэ диэри» уонна да атын тыллары билэн билигин дьиэбитигэр ордук туттар тылбыт буолла. Элбэх доҕоттордонон кэлбититтэн астына кэпсиир. Маннык иһиттэххэ кыра да буоллар истиҥ сахалыы тыллары билэр буолан кэлбититтэн, салайааччы Ольга Дмитриевнаҕа биһиги дьиэ кэргэн аатыттан улаханнык махтанабыт. Үлэҕит таһаарыылаах буоллун, оҕолоргутун бибилэтиэкэҕэ сырытыннарыҥ диэн баҕа санаабытын тириэрдэбит.”

Маннык үтүө, истиҥ тыллардаах суруктар төрөппүттэртэн кэлиилэрэ, биһиэхэ, бибилэтиэкэ үлэһиттэригэр, олус үөрүүлээх. Ол аата биһиги оҕолорго туһалааҕы үөрэппит, кэпсээбит эбиппит диэн үлэбит түмүктээҕин көрдөрбүппүтүттэн астынабыт. Маны этэн туран баҕарыам этэ хас биирдии оҕоҕо үөрэх дьылын үөрэ-көтө көрсөргүтүгэр, элбэх билиини ылынаргытыгар уонна аны сайыҥҥа дылы: “Көрсүөххэ диэри, күндү оҕолор!”

Ольга Иванова