Балаҕан ыйын 3-с күнүгэр Иккис аан дойду сэриитэ түмүктэммитэ 81 сылыгар аналлаах «Өйдөбүнньүк уонна киэн туттуу» диэн тэрээһин Ньурба куоракка ыытылынна. Бу күн киһи-аймах историятыгар саамай үгүс сүтүктээх-алдьатыылаах сэрии түмүктэммит күнэ буолар.

Сүрүн түгэнинэн СӨ сэрии уонна үлэ бэтэрээннэрин Сэбиэтин Знамятын Ньурба куоракка көрсүү буолла. Кыайыы болуоссатыгар Октябрьскай нэһилиэк баһылыга Семен Корякин салайааччылаах нэһилиэк дэлэгээссийэтэ Знамяны куорат баһылыга Геннадий Игнатьевка үөрүүлээх быһыыга-майгыга туттарда. Манна улуус салайааччылара, бэтэрээннэр, оскуола үөрэнээччилэрэ, уопсастыбаннастара кытыннылар.

Тэрээһин кэмигэр чуумпуруу мүнүүтэ биллэриллэн, киһи аймах историятыгар хаһан да буолбатах элбэх сүтүктээх сэрии сиэртибэлэрин, биир дойдулаахтарбытын кэриэстээн иһийэн турдубут. Кыайыы саллаатын пааматынньыгар гирлянда уурулунна. Тэрээһини куорат бэтэрээннэрин холбоһуктаах хуора уонна Искусство оскуолатын вокальнай ансаамбылын эҕэрдэ ырыалара киэргэттэ.

Тэрээһин чэрчитинэн Убайаан бибилэтэкэтин эдэр үлэһитэ Валерия Обоева эдэр ыччат аатыттан эҕэрдэ тылы эттэ. Ону таhынан Ньурбатааҕы киин бибилэтиэкэ фондатыттан Аҕа дойду сэриитигэр биир дойдулаахтарбыт кыттыыларын, барыта Кыайыы туһугар диэн анаабыт олохторун кэпсиир  кинигэлэринэн быыстапка тэрилиннэ. «Война в сердце, в памяти, в книгах» быыстапкаҕа иккис аан дойду сэриитин историятын, хорсун саллааттарбыт тустарынан, нэһилиэктэринэн биһиги биир дойдулаахтарбыт Квантунскай аармыйаны үлтүрүппүт күннэрин кэпсиир кинигэлэр, хаартыскалар, докумуоннар көрдөрүлүннүлэр.

Бу курдук бэлиэ күн үрдүк таһымнаахтык ыытылынна.