Ааӄар киин балаӄан ыйын 15 күнүгэр, «Сахабынан киэн туттабын» бырайыак чэрчитинэн, Ньурба куорат оскуолатын 4 кылаас үѳрэнээччилэрин төрөөбүт тылга аналлаах күрэхтэһиигэ муста. Иккис тэрээһиммит бу бырайыак сыалын-соругун толорон, оҕолорго төрөөбүт тылбыт сүмэтин иҥэрэр, күннээҕи олоххо-дьаһахха сахалыы саҥарарга көҕүлүүр соруктаах.
Күрэҕи Ньурбатааҕы оҕо бибилэтиэкэтэ, айар куттаах «Сайдам тыл» түмсүү уонна эрчимнээх «Ньурба эрэлэ» оҕо хамсааһынын кыттыылаахтара иилээн-саҕалаан ыыттылар.
Тэрээһиҥҥэ барыта биэс кылаастан 70 үөрэнээччи тоҕуоруһа мустан, билиилэрин-көрүүлэрин тургуттулар. Кылаастар хайыы-үйэ күннээҕи үөрэхтэригэр, сырыыларыгар сахалыы мааны таҥастарын кэтэн кэлбиттэрэ ордук үөрдэр.
Оҕолор алта түһүмэҕинэн сатабылларын көрдөрдүлэр:
«Тыл хонуута» — манна оҕолор тыл саппааһын баайын, суолтатын таба өйдүүр дьоҕурдарын көрдөрдүлэр;
«Кэпсээн хонуута» — айар дьоҕуру сайыннарар, тылтан тэнийбит этии оҥоруута түһүмэх;
«Таабырыннар» — мындыр өйү, түргэн толкуйу эрэйэр, былыргы норуот муудараһын билэргэ угуйар;
«Өс хоһоонноро» — өбүгэлэрбит үйэлэр тухары мунньубут такайыылаах этиилэрин төһө билэллэрин тургуттулар;
«Сахалыы оонньуулар» — ѳй үлэтин сэргэ сымса буолууну эрэйэр остуол оонньуута.
Күрэс бэрт сэргэхтик, өрө көтөҕүллүүлээхтик ааста. Хас биирдии кыттааччы ис сүрэҕиттэн кыһаллан кытынна, хамаандаӄа балл эбэргэ кыһалынна.
Түмүккэ бастыҥнары наҕараадалааһын буолла. Бастакы миэстэни Степан Васильев аатынан элбэх хайысхалаах гимназия 4 а кылааһа (О.Г.Акимова) ылан, үөрүү өрөгөйүн биллэ. Иккис миэстэӄэ Ньурбатааӄы 3-с нүѳмэрдээх алын сүһүѳх оскуолатын 4 б кылааһа (И.А.Винокурова) тигистэ. Үһүс миэстэни Степан Васильев аатынан элбэх хайысхалаах гимназия 4 б кылааһа (Н.К.Трофимова) ылла.
Күндү төрөппүттэр! Тыл диэн — омук тыына, кини дууһата. Оҕолоргутугар кинигэни ааҕан биэрэн, дьиэ иһигэр сахалыы холкутук, ыраастык кэпсэтэн, остуоруйалаан, өс хоһооннорун холбоон, кинилэр тылларын-өстөрүн байытарга кыттыһыҥ. Сахабыт тыла өлбөт-сүппэт, чэчирии сайдар туһугар бары бииргэ күүс-көмө, тирэх буолуоҕуҥ!
Ааҕар киин пресс-киинэ
