Ньурба оройуонун Тыл сүбэтэ, Оҕо-ыччат бибилэтиэкэтин иһинэн Ааҕар киин, “Сайдам тыл” түмсүү холбоһуктаах “Мин сахабынан киэн туттабын” бырайыак чэрчитинэн Ньурба куорат оскуолаларын 3 – 4 кылаастар үөрэнээччилэрин икки ардыгар мүнүүтэҕэ ааҕыы күрэҕэ буолан ааста. Санатан этэр эбит буоллахха, бу бырайыагынан үөрэнээччилэр төрөөбүт тылларынан саҥаларын көҕүлүүр ыйын аайы араас тэрээһиннэр ыытыллаллар.

Бастакы түһүмэххэ ааспыт нэдиэлэ устата кылаас салайааччылара миэстэтигэр үөрэнээччилэри барыларын хабан мүнүүтэҕэ аахтардылар (185 оҕо кытынна). Онтон бүгүн, алтынньы 23 күнүгэр, Оҕо бибилэтиэкэтэ сарсыарда өттүгэр 3 кылаастарга, эбиэт кэнниттэн 4 кылаастарга түмүктүүр түһүмэҕи ыытта (46 оҕо).

Сыаналааһыҥҥа сүрүн болҕомто тыл ахсааныгар эрэ буолбакка, аахпыты өйтөн кэпсээһиҥҥэ уурулунна. Оҕолор Ульяна Винокурова – Оруоһа «Сыл-дьыл эргиирэ: уон икки ый” диэн аныгы остуоруйалаах кинигэтиттэн аахтылар уонна кэпсээтилэр.

Бары да боччумуран олорон, уостарын-тиистэрин оҥостон тиэкиһи ааҕарга кыһалыннылар. Ол да буоллар сорохтор сахалыы дорҕооннорго ыарарҕаталлара баар суол. Үксүн уһун аһаҕас, хоһуласпыт бүтэй дорҕооннорго. Киһини үөрдэрэ диэн, саҥаларын-иҥэлэрин акцена сахалыы. Түмүккэ 3 кылаастар икки ардыларыгар кыайыылааҕынан гимназия 3а кылааһын үөрэнээччитэ Данилова Виктория таҕыста, 2 миэстэҕэ – Николаев Матвей (3№ оскуола, 3а кылаас), 3 миэстэҕэ – Васильева Сайаара (гимназия, 3а кылаас).

4 кылаастар ортолоругар кыайыыны ылла Иванова Кира (3№ оскуола, 4б кылаас), 2 миэстэни Борисова Стефания, 3 миэстэни Афанасьев Оскар — гимназия, 4а кылаас үөрэнээччилэрэ ыллылар. Кинилэр Добун суруктарынан бэлиэтэннилэр. Кыттааччылар бары туоһу суруктары туттулар.

Тэрээһин түмүгэр эһиилги сылга эмиэ бу курдук күрэххэ бэлэмнэнэнэллэригэр, ыраастык доргуччу ааҕарга, айымньы ис хоһоонугар болҕомто уурарга кыһаллалларыгар сүбэ курдук этилиннэ.

Оҕо-ыччат бибилэтиэкэтэ