Ньурба киин улууһун бибилэтиэкэтин филиаллара «Дьөгүөрэптии ааҕыылар-2026» иһинэн ыытыллар «Көмүс күн кыырпаҕын ыһан» хоһооннорунан уус ураннык ааҕан устууга өрөспүүбүлүкэтээҕи күрэххэ көхтөөхтүк кытыннылар.
«Көмүс күн кыырпаҕын ыһан» күрэх хараҕынан көрбөт бэйиэт, Саха Өрөспүүбүлүкэтин Суруйааччыларын сойууһун чилиэнэ, СӨ култууратын үтүөлээх үлэһитэ, Саха сиригэр бастакы тифлопедагогтарынан биирдэстэрэ, саха тылын Брайль систиэмэтинэн алпаабытын айааччы Иван Николаевич Егоров — Горнай айар үлэтигэр анаммыт.

Бу күрэххэ үһүс кыттааччыбыт Ньурба куоратын Ф.Г.Сафронов аатынан киин модельнэй бибилэтиэкэ доҕоро, Үөһээ-Бүлүү, Оҥхой нэһилиэгиттэн төрүттээх Ньурбатааҕы кырдьаҕастар дьиэлэрин олохтооҕо, хараҕынан 1 группалаах инбэлиит Федоров Василий Васильевич Иван Горнай «Мин көрөбүн сүрэхпинэн» хоһоонун толоруута.