Николай Федорович Григорьев » Күндү дьонум барахсан…» кинигэ сүрэхтэниитэ.

208 страницалаах кэрэхсэтэр хаартыскалардаах, Николай Федорович айымньылаах олоҕун күүскэ арыйар, олус ааҕымтыа, интириэһинэй ахтыылартан таҥыллан оҥоһуллубут Ю. Гагарин аатынан Дьокуускайдааҕы типографияҕа бэчээттэнэн таҕыста. 300 экземплярынан тахсыбыт кинигэ алта олуктан турар.

Кинигэни кыыһа В.Н. Васильева хомуйан, бэлэмнээн дойдутугар-дьонугар күндү бэлэх оҥордо. Дьокуускай куораттан уолаттара «Гражданскай килбиэн» бэлиэ кавалера Виктор Николаевич, СӨ суруналыыстарын сойууһун бириэмийэтин лауреата, СӨ бэчээтин туйгуна Федор Николаевич, кыыһа Валентина Николаевна Ньурбатааҕы киин библиотека үлэһиттэринээн тэрийдилэр.

Н.Г. Федоров директордаан сылдьыбыт Убайаанын оскуолатын коллектива, Ньурбатааҕы көһө сылдьар государственнай драматическай театр артыыстара, үлэһиттэрэ, аймахтара, доҕотторо дьоһун ахтыы түгэнин оҥордулар. Ньурба куорат дьаһалтатын баһылыгын солбуйааччы М. К. Куличкина «Сыл патриота» бэлиэни Валентина Николаевнаҕа туттарыытын мустубут дьон уруйдуу көрүстэ. Ньурбатааҕы үөрэҕирии салалтатыттан Котоконова Е. М., Доҕордоһуу түмэлиттэн Никитина Л. В. саҥа кинигэ тахсыбыт үөрүүтүнэн эҕэрдэ истиҥин анаатылар.Саха фольклорун пропагандиһа, сатабыллаах салайааччы холобур буолар олоҕун кэпсиир кинигэ ааҕааччытын булуо, үйэлэргэ дьон-сэргэ биһирэбилин ылыа.