Ийэ күнүн декадатыгар аналлаах тэрээһиннэр киин бибилэтиэкэ ситимигэр ситиһиилээхтик бара тураллар.

Алтынньы 19 күнүгэр бибилэтиэкэбит ааҕар саалыгар Ньурбатааҕы дьиэ кэргэҥҥэ уонна оҕолорго көмө оҥорор кэлим киин үлэһиттэринээн бу тэрилтэҕэ эмтэнэ сылдьар, доруобуйаларынан хааччахтаах оҕолор ийэлэригэр литературнай тэрээһин бэрт сэргэхтик ааста. Тэрээһиммит ыалдьыттара поэтесса, аҕыс оҕо ийэтэ, элбэх оҕо эбээтэ А. Р. Сельтюкова-Айаалла олоҕун олуктарыттан, айар үлэҕэ хайдах киирбитин, суруйар-айар үлэ уустуктарын кэпсээһинэ, СР үөрэҕириитин туйгуна, Дьиикимдэ нэһилиэгин бочуоттаах олохтооҕо, суруйааччы Степан Федотов аатын үйэтитиигэ күүскэ үлэлии сылдьар Л. А. Канаева Ньурба поэттарын хоһооннорун өйтөн ааҕыыта барыбытын сэргэхситтэ. Ыалдьыттар араас оттон оҥоһуллубут хас да көрүҥ чэйи минньигэс бурдук астары кытта амсайа-амсайа тургутук ыйытыктарга күрэхтэстилэр. Эрдэттэн турбут быыстапкаҕа баар кинигэлэртэн талан ылбыт поэттарын хоһооннорун уус-ураннык ааҕан араас туһалаах бириистэри ылан үөрдүлэр. Луиза Акимовна бэйэтэ бэлэмнээбит боппуруоһугар сөпкө эппиэттээбит ийэҕэ Степан Федотов кинигэтин, хоһоон ааҕыытыгар бастаабыт ийэҕэ Айаалла бэйэтин кинигэтин автографтаан туттарбыттара олус кэрэхсибиллээх.
Бибилэтиэкэбит ааҕааччыны кытта үлэ салаатын салайааччыта Елена Петровна ыалдьыттарга истиҥник махтанна, сэмэй бэлэхтэри туттарда.
Ыалдьыттарбыт оҕолор илиилэринэн оҥорбут открыткаларын бэлэх ууннулар.
Тэрээһини ыытыыга, биллэн турар, ыытар миэстэҥ оҥоруута улахан оруоллаах. Манна киин библиотека бары үлэһиттэрин сатабыллаах илиилэринэн оҥоһуллубут саалбыт ыалдьыттар үрдүк кэрэхсибиллэрин ылла. Араас фотозоналар, быыстапкалар, самовардаах сандалылар…барыта үөрүүгэ-көтүүгэ, дьиҥ чахчы бырааһынньыктыы турукка тириэртэ.
Астыммыт, саҥаны бэйэтигэр ылыммыт, иҥэриммит ыалдьыт махтала-үлэбит үөрүүтэ, ситиһиитэ.

Ааҕааччыны кытта үлэ салаата.