Ахсынньы 12 күнүгэр ыаллыы сытар Үөһээ Бүлүү нэһилиэктэриттэн Үөһээ Бүлүүтээҕи Кыһыл дружина суолунан айан иккис түһүмэҕин кыттыылаахтара: Үөһээ Бүлүүтээҕи устуоруйа уонна этнография түмэлин кыттыылаахтара, кыраайы үөрэтээччилэр, Кыһыл дружина байыастарын сыдьааннара, оскуола оҕолоро кэлэн судаарыстыбаннай, политическэй деятель Исидор Бараахап төрөөбүтэ 125 сылынан уонна Гражданскай сэрии 100 сылынан Ньурба куоратыгар К. Д. Уткин аатынан Норуоттар доҕордоһуулара түмэлгэ сылдьан баран Чаппандаҕа С. П. Алексеев — Боһуут аатынан оскуола-саадка сылдьан үөрэнээччилэри, учууталлары кытта көрсүһүү буолла. Кинилэр экспедиция сыалынан Исидор Бараахап гражданскай сэриигэ оруолун уонна Үөһээ Бүлүүтээҕи Кыһыл дружина Ньурбатааҕы көмүскэлгэ кыттыытын туһунан матырыйаал хомуйуу, Үөһээ Бүлүү улууһугар өрүс уҥуоргу нэһилиэктэр устуоруйаларыгар сэрии ыар чахчыларын чопчулааһын быһыытынан үлэни ыыта сылдьаллар эбит. И.Н.Барахов аатынан түмэл салайааччыта Светлана Даниловна Копыленко Исидор Бараахап гражданскай сэрии сылларыгар, үлэтин сырдатта, түмэлгэ кинигэ бэлэхтээтэ. Хомустаах нэһилиэгиттэн кыраайы үөрэтээччи Васильева Галина Николаевна Бүлүү куорат Оборонатын салайааччыта, гражданскай сэрии кыттыылааҕа, педагог-методист Саха сиригэр 6 саастаах оҕону үөрэтиигэ аан маҥнай ааны аспыт, педагогическай энциклопедияҕа киирбит Лебедкин Андрей Дмитриевич, гражданскай сэрии кыттыылаахтара: Лебедкин Иван Петрович, Бойлохов Иван Федотович — Чобуоххай, Харабаев Иван Егорович — Муос Харабаай, Габышев Николай Алексеевич, Габышев Александр Алексеевич тустарынан бэрт элбэҕи, төрдүлэрин — сыдьааннарын кэпсээтэ уонна Сидорова Т. Д. түмэлгэ диэн кинигэлэри бэлэхтээтэ. Нам нэһилиэгин олохтоох модельнай библиотека библиотекаря Саввинова Уруйдаана Юрьевна Александра Овчинникова туһунан билиһиннэрдэ, сэдэх ханна да суох хаартысканы, Александра Овчинникова кыра сылдьан ийэтин аттыгар турар, элбэх киһи кыттыылаах хаартыската баарын Н. Т. Степанов аатынан түмэл салайааччыта Сидорова Т. Д. туттарда. Олохтоох библиотекарь Тимофеева Е. С. Нам библиотекатыгар Ньурба улууһун 10 биллэр — көстөр салайааччыларын, САССР 100 сылынан анаан оҥорбут буклеттарын туттарда. Сидорова Т. Д. Чаппанда нэһилиэк историятын, Чаппандаттан икки сэрии гражданскай уонна А5а дойдуну көмүскүүр сэрии кыттыылааҕа: Скобелев Спиридон Данилович туһунан сырдатта, Үөһээ Бүлүү делегациятыгар «Омолдоон» уонна «Степанов Н. Т.» кинигэлэрин туттарда. Кэлбит ыалдьыттар Н. Т. Степанов аатынан түмэли көрдүлэр, баай матырыйааллаах түмэли көрөн астынан бардылар, хаартыскаҕа түстүлэр.
Тимофеева Е. С.
