Ф. Г. Сафронов аатынан Киин бибилэтиэкэ улахан саалатыгар бүгүн, сарсыарда 10.00 чаастан ньурбалар улахан доҕотторбутун «Айар» кинигэ кыһатын салалтатын Август Васильевич Егоровы, Валерий Николаевич Луковцевы кытта көрсүһүүгэ муһуннубут. Кинилэр, өрүү буоларын курдук, интириэһинэй доҕотторун — суруйааччы Василий Гоголевы — Уйулҕаны, поэтесса Любовь Горохованы — Сүүмэҕи илдьэ кэлбиттэр. Саха литературатын кэскилин тула кэпсэтиини сэргэ Уйулҕан «Туоһахта уонна Лэкиэс» кинигэтин, Сүүмэх түөрт хоһооннорун хомуурунньугун кинигэлэрин билистибит.

Төрөөбүт ийэ тылбытынан устар ууну сомоҕолуу кэпсииллэрэ интириэһинэйин баҕаһын! Мустубут дьон үс чаас устата тугу да умнан тыыммакка да олорон иһиттибит, сэргээтибит, хайҕаатыбыт. «Айар» кинигэ кыһатыгар тахсыбыт кинигэлэри ааптардартан бэлэхтэтэн бибилэтиэкэбит фондата байда!

Тымныыны да аахсыбакка кэлбит дьон-сэргэ кинигэ атыылаһан автографтаттылар, бэйэлэригэр саҥа дьылынан бэлэх оҥоһуннулар. ТӨРӨӨБҮТ ТЫЛ — НОРУОТ САЙДАР КЭСКИЛЭ диэн санаанан салайтаран үлэ үөһүгэр сылдьар мааны ыалдьыттарбытыгар махтал тылларын анаатыбыт, инникитин да айымньылаах олохторугар ситиһиилэри түстээтибит.