Оҕо саас умнуллубат кэмнэрин санатар: «Пионерия умнуллубат сырдык өйдөбүллэрэ»- кинигэ сүрэхтэниитэ 🚩🎺🥁🎉
Мин түөспэр тэлээрэ көтөр
Уот кыһыл пионер хаалтыһа,
Линейка, сбор түмсүүтүн
Сүрэхпэр иҥэрэ сылдьабын.
Ленин төрөөбүт күнүгэр
Туйгуннар кэс тылы этэннэр,
Пионер кэккэтин хаҥатан
Уот кыһыл хаалтыһын бааналлар
Ыам ыйын 19 күнүгэр былырыын 2022 сыллаахха Пионерия төрөөбүтэ 100 сыллаах өрөгөйдөөх үбүлүөйүн бэлиэтээбиппит. Бу кэрэ-бэлиэ түгэн чэрчитинэн бэчээттэнэн күн сирин көрбүт кинигэ: «Пионерия умнуллубат сырдык өйдөбүллэрэ» — диэн. Бу улахан форматтаах глянцевай кумааҕыга оҥоһуллубут буолан тупсаҕай көрүҥнээх, өҥнөөх 44 страницаттан турар кинигэ Ньурбаҕа «Тупсарт» полиграфическай өҥө кыһатыгар 50 экземплярынан күн сирин көрдө. Кинигэ тас өттүн ыам ыйын 9 күнүнээҕи парадын, пионерга ылыы кэрэ-бэлиэ түгэнин көрдөрөр хаартыскалара кэрэһэлиир, Сэбиэскэй Сойуус пинердарын мэктиэ тыллара киэргэтэр.
Кинигэни хомуйан, таҥан оҥорбут дьоннорунан буолаллар:
- Розалия Софроновна Бушкова – Российскай Федерация үөрэҕириитин туйгуна, учууталлар учууталлара, «Баһаатай — инструктор » бэлиэни маҥнайгынан ылбыт, өр кэмҥэ Убайаан оскуолатын Ю. А. Гагарин аатынан дружина пионер баһаатыйынан үлэлээбит.
- Валентина Никифоровна Котоконова – Саха Республикатын социальнай эйгэтин үтүөлээх үлэһитэ, Саха Республикатын социальнай харалтаҕа туйгуна, Россия Федерациятын үлэҕэ бэтэрээнэ, Ньурба улууһун бочуоттаах олохтооҕо, Убайааҥҥа Оҕо дьиэтин П. А. Ойуунускай аатынан пионерскай дружинатын баһаатайа.
Кинигэҕэ 70 — 80 сылларга Убайаан оскуолатын маҥнайгы космонавт Ю
А. Гагарин аатынан пионерскай дружинаҕа үлэлээн ааспыт баһаатайдар, ол кэминээҕи пионердар 41 ахтыылара тиһиллэн киирдилэр. Пионерия историятын сырдатар үгүс сэдэх хаартыскалар кэрэһэлииллэр.
Кинигэ киирии тылыгар «Ньурба эрэлэ» оҕо общественнай тэрилтэтин үрдүк категориялаах педагог — тэрийээччитэ Давыдова Валентина Яковлевна, Российскай Федерация уопсай үөрэхтээһинин Бочуоттаах үлэһитэ, «Дети Саха — Азия» Аан дойдутааҕы оҕо фондатын лауреата, Саха Республикатын учууталларын учууталлара : «Пионердар Сэбиэскэй Сойуус курдук саамай кэрэ дойдуга олорорбутуттан киэҥ туттарбыт. Хас биирдии мүнүүтэбит туһалаах дьыаланнан туолара, үлэҕэ, үөрэххэ холобур буоларга, аҕа саастаахтарга көмө, кыраларга көмүскэл, кырдьыксыт уонна сиэрдээх буоларга кыһалларбыт», — диэн оччотооҕу кэмнэри ахтан — санаан ааһар.
Бу дьоро күн икки бүк үөрүүлээх кэрэ — бэлиэ түгэнинэн : Үөрэҕирии управлениетыттан Васильева Варвара Прокопьевна кинигэ ааптардарыгар Розалия Софроновнаҕа уонна Валентина Никифоровнаҕа: «За вклад в развитие системы образования Нюрбинского района» — диэн бэлиэни туттарыыта буолла.
Бэйэлэрин эҕэрдэ тылларын эттилэр Ньурба куорат баһылыгын солбуйааччыта Куличкина М. К., Култуура департаменын салайааччытын солбуйааччыта Михайлова А. И., кырдьаҕастар уонна инбэлииттэр Дьиэлэрин салайааччыта Семенова И. Ф., К.Д. Уткин аатынан түмэл научнай салаатын сотруднига Борисов Б. Б.
Партия Ньурба оройуонунааҕы комитетыттан күндү ыалдьыт буоллулар : первичнай партийнай тэрилтэ 2 сэкэрэтээрэ Валерий Степанович Сергин, райком контрольнай — ревизионнай комиссиятын чилиэнэ Розалия Семеновна Самсонова, райком 1 сэкэрэтээрэ Татьяна Георгиевна Кардашевская. Пионер буола сылдьыбыт кэмнэрин истиҥник санаан аастылар. Ыраах Калиниград куораттан пионерскай дружина пионердара балтылыы — эдьиий Лейла уонна Оксана Шарабориналар бэйэлэрин видео — эҕэрдэлэрин ыыппыттарын көрөн, мустубут ыалдьыттар сүргэлэрэ көтөҕүлүннэ.
Салҕыы Ю. А. Гагарин аатынан пионерскай дружина баһаатайдара, ол кэмнэрдээҕи пионердар аалай хаалтыс баанан пионер үрдүк аатын сүгэн киэҥ туттубут умнуллубат кэмнэрин сэргэхтик ахтан — санаан аастылар, дуоһуйа сынньаннылар.
Кинигэ сүрэхтэниитин үөрүүлээх дьоро күнүн түмүктээһинин Токусаровтар дьиэ кэргэттэрин аатыттан эҕэрдэ — бэлэх — Володя Ульянов сэбэрэлээх пионерскай значок, кыһыл хаалтыс анал ойуулаах күлүмүрдэс фейерверктаах минньигэс торт киириитэ киэргэттэ.
Семенова Лидия Петровна, оҕо уонна ыччат бибилэтиэкэтин үлэһитэ.
