Саха Өрөспүүбүлэкэтин култууратын үтүөлээх үлэһитэ, СӨ бочуоттаах бэтэрээнэ, Госсулууспа бэтэрээнэ Арассыыйа Суруналыыстарын Сойууһун чилиэнэ, Ньурба оройуонун, Октябрьскай, Хорула, Мэҥэдьэк, Ньурбачаан, Бордоҥ нэһилиэктэрин бочуоттаах киһитэ, кыраайы үөрэтээччи уонна үйэтитээччи Анисимов Иван Алексеевиһи Ньурбаҕа билбэт киһи суоҕа буолуо. Өрүү фотоаппаратын тута сылдьар кыра уҥуохтаах, сэргэх сэбэрэлээх Иван Алексеевич Мэҥэдьэк нэһилиэгэр 85 сыл ынараа өттүгэр уол оҕо буолан бу орто дойдуну киэргэтэ, иһитиннэрэ, үйэтитэ кэлбитэ. Саха государственнай университетын историяҕа салаатын бүтэрэн идэтинэн учууталынан, оскуола директорынан үлэлээбитэ. Үгүс билиилээх, тэрийэр-салайар дьоҕурдаах киһини үөрэҕирии ситимиттэн партийнай-советскай үлэҕэ ыланнар улууһу салайсыыга олоҕун улахан аҥаарын анаабыта.
Кини Ньурба оройуонуттан Аҕа дойду сэриитигэр кыттыбыт буойуттары, үлэ фронун, тыыл бэтэрээннэрин, оройуон биллиилээх дьоннорун, оройуон историятын үйэтитиигэ тугунан да кэмнэммэт күүстээх үлэтэ баһаам элбэх ахсааннаах кинигэ буолан тахсан бар дьоҥҥо тарҕанар. Биһиги оройуоннааҕы бибилэтиэкэбит ситимин фондатыгар кини кинигэлэрэ — саамай күндү баайбыт. Ааҕааччыларбыт, оҕо-ыччат Ньурбаҕа сыһыаннаах ыйытык боппуруостарын үгүстүк Иван Алексеевич кинигэлэриттэн булаллар.

Киин бибилэтиэкэ улахан доҕоругар, Ньурба тумус туттар кыраайы үйэтитээччитигэр Иван Алексеевичпытыгар, өрөгөй үбүлүөйдээх сылгар бар дьонуҥ махтал сэргэ үлэҕэр өссө үтүмэн ситиһиилэри, чэгиэн-чэбдик, сэргэх олоҕу баҕарабыт, дириҥ ытыктабылбытын тириэрдэбит!