Дьиикимдэттэн төрүттээх Ньурба улууһуттан бастакы ССРС, онтон Саха сирин суруйааччыларын Сойууһун, ССРС суруналыыстарын Сойууһун чилиэнэ Степан Прокопьевич Федотов тыыннааҕа буоллар быйыл олунньу 10 күнүгэр 88 сааһын туолуо этэ.
С. П. Федотов зоотехник идэлээх да буоллар айылҕаттан суруйар аналлаах буолан тыа дьонун олоҕун, үлэтин-хамнаһын уустаан-ураннаан сырдатан «Эдэр коммунист», «Социалистическая Якутия», «Кыым» хаһыаттарга корреспонденынан, суруналыыһынан үлэлээбитэ. Тыыннааҕар биэс кинигэтэ күн сирин көрбүттэрэ: «Кынаттаах олох», «Сирдээҕи сулустар», «Сүрэх», «Аал-луук мас анныгар», «Билэр-билбэт дьонум».
Степан Федотов 1983 сыллаахха ыарахан ыарыыттан 48 сааһыгар өлбүтэ. 1985 сыллаахха доҕоро, суруйааччы В. Ф. Гольдеров бэлэмнээн алтыс «Көрсөн ааһар көтөл күннэр» кинигэтэ күн сирин көрөр. 2002 сыллаахха эмиэ доҕоро Василий Федотович кыһамньытынан сэттис «Махтал кустуга» кинигэтэ бэчээттэнэр. 2007 сылга Ф. Г. Петрова хомуйан С. П. Федотов туһунан ахтыылар хомуурунньуктара «Кынаттаах олох тойуксута» бэчээттэнэн тахсар. 2010 сыллаахха, суруйааччы төрөөбүтэ 75 сылыгар, В. Ф. Гольдеров хомуйан «Кынаттаах олох» айымньыларын хомуурунньуга уонна Дьикиимдэ нэһилиэгин бибилэтиэкэрэ С. Н. Павлова бэлэмнээбит «Степан Прокопьевич Федотов: биобиблиографическай ыйынньыга» тахсыбыттара. Бу сыл Степан Прокопьевич төрөөбүт — үөскээбит Дьөттүн алааһыгар балаҕанын, саҥалыы көрүҥнээн тутууга үлэ күүскэ барбыта. Суруйааччы бииргэ төрөөбүт быраата, идэтинэн мас ууһа Дмитрий Прокопьевич Федотов оҕо сааһа ааспыт алааһын сөргүтэн оҥорууга өрө көтөҕүллэн күүскэ үлэлэспитэ. Саҥа балаҕанын аныгылыы сиэринэн киэҥ түннүктээн, муосталаан оҥотторбута. Дьөттүн алааһа, билигин Ньурба ытык сирдэриттэн биирдэстэрэ. 2013 сыллаахха «Бичик» кинигэ кыһатын «Уран тыл уустара» сериятыгар В. Ф. Гольдеров, С. Н. Павлова хомуйан Степан Федотов «Ыһыах түүн» кинигэтэ күн сирин көрбүтэ. Учуутал идэлээх, нэһилиэк баһылыгынан үлэлээбит биир дойдулааҕа Луиза Акимовна Канаева суруйааччы кыыһа Сардана Степанова Федотоваҕа харалла сытар архыыбынан дьарыктанан 2020 сыллаахха Степан Федотов хоһооннорун хомуйан «Туойуох-ыллыах санаам киирдэ» кинигэ таһааттарбыта. Салҕыы эмиэ архыыбтан көстүбүт суруктарынан «Эргэ чымадаан кистэлэҥэ» кинигэ бэлэмнээн бэчээккэ ыытта.
Ньурба сирин бастакы суруйааччыта, хомоҕой тыллаах, сытыы бөрүөлээх суруйааччы, кынаттаах олох тойуксута, төрөөбүт дойдутун, тулалыыр дьонун, ийэ тылын муҥура суох таптыыр Степан Прокопьевич Федотов аата үйэлэри уҥуордаан ААТА ААТТАНА ТУРУО, АЙЫМНЬЫЛАРА саха тыллаах сүҥкэн баайа буолан кэлэр кэнчээри ЫЧЧАККА ТИИЙИЭ!