Олунньу 28 күнүгэр Ф.Г.Сафронов аатынан Киин бибилэтиэкэ тэрийиитинэн 2022 сыл бүтүүтэ, Ийэ сылын баттаһа тахсыбыт, “Ийэ баар буолан…” диэн иһирэх ааттаах кинигэ сүрэхтэниитэ буолан ааста. Кинигэ сүрүн геройа Чуукаарга олорбут элбэх оҕо тапталлаах ийэтэ, эбэтэ Петрова Мария Николаевна(Төбөт Маайа, Бөтүрүөп Маайа) буолар. Кинигэни хомуйан оҥордулар улахан кыыһа Петрова Светлана Гаврильевна, үлэ, тыа хаһаайыстыбатын бэтэрээнэ, АПК бочуоттаах үлэһитэ, СӨ үөрэҕириитин бочуоттаах бэтэрээнэ, Ньурба улууһун бочуоттаах олохтооҕо, Г.С.Петров педагогическай династиятын баһылыга уонна хос сиэнэ, Россия Суруналыыстарын союһун чилиэнэ Светлана Ивановна Павлова. 92 страницалаах кинигэ Ю.А. Гагарин аатынан Саха Өрөспүүбүлүкэтин типографиятыгар 200 экземплярынан тахсыбыт. Кинигэ 5 түһүмэхтээх:
1. Киирии тыл;2. Дьон-сэргэ сүрэҕэр; 3. Кыргыттар ахталлар; 4. Оҕо хараҕынан; 5. Кимтэн кииннээхпитий? Петрова Мария Николаевна аҕатын уонна ийэтин өттүттэн хаан урууларын Гаврильева Елизавета Ивановна, Николаев Иван Ильич-Сиэн Дыынайап суруйууларынан кинигэ түмүктэнэр. Кинигэҕэ элбэх хаартыскалар киирбиттэр. Ийэлэрин докумуоннарын сыа-сым курдук тутан кинигэҕэ киллэрбиттэрэ кэлэр көлүөнэҕэ ураты өйдөбүнньүк буолуоҕа. Бу буоллаҕа, оҕолоро ийэҕэ махталлара, ытык иэстэрин төлөбүрэ. Кинигэ бэчээттэнэн тахсыытыгар күүс-көмө буолбут «Ньурба» МТ администрациятын дьыаларарын дьаһайааччы О.И. Алексееваҕа, Ньурба оройуонун Сэбиэтин бэрэссэдээтэлигэр С.И. Евсеевкэ ааптар Петрова С.Г. махталын тиэрдэр. Эҕэрдэ тыллары Ньурба оройуонун дьаһалтатын сүрүннүүр специалиһа Степанова В.В., Сүлэ нэһилиэгин баһылыга Иванов Ю. Д. уонна ыҥырыылаах ыалдьыттар истиҥник эттилэр. Музыкальнай эҕэрдэлэри Сүлэттэн “Ырыа ыллаары” — Раиса Иванова, «Ийэҕэ махтал» квартет тиэртилэр. Светлана Гаврильевна кырачаан хос сиэнэ Никита ийэ туһунан хоһоон ааҕан иһитиннэрдэ. Кэллиэгэлэрбит Андреева Клавдия Владимировна Чукаар нэһилиэгин библиотекара, «Эбэ» туөлбэтин салайааччыта, Николаева Маргарита Михайловна Сүлэ нэһилиэгин библиотекара эҕэрдэлээтилэр. Бу дьоро, бэлиэ күҥҥэ Светлана Гаврильевна ийэтин өттүнэн аймахтара күндү ыалдьыт буолулар. Истиҥ, иһирэх ахтыыларын бэлэхтээтилэр. Кинигэ сүрэхтэниитигэр мустубут ыалдьыттар «Норуот дьылҕата – ыал олоҕор», «Бөтүрүөп Маайа таҥаһа», «Бөтүрүөп учуутал суруйуулара, наҕараадалара», «Улахан кыыстара Светлана үлэлэрэ» быыстапкалары көрөн сэҥээрдилэр.
Ааҕааччыны кытта үлэлиир салаа.
