Бүгүн кулун тутар 16 күнүгэр саха литературатын төрүттээчилэртэн биирдэстэрэ, айар тыл аҕатынан ааттаммыт уһулуччулаах поэт, саха бастакы учуонайа, бөдөҥ общественнай диэйэтэлэ Алексей Елисеевич Кулаковскай — Өксөкүлээх Өлөксөй төрөөбүт күнэ.
2022 сыллаахха ыам ыйын 25 күнүгэр Өрөспүүбүлүкэ Ил Дархана Айсен Николаев «О 150-летии со дня рождения А.Е. Кулаковского» ыйааҕа тахсыбыта. Докумуоҥҥа олоҕуран, Өрөспүүбүлүкэҕэ 2023-2027 сыллары Алексей Елисеевич Кулаковскай – Өксөкүүлээх Өлөксөй биэс сылынан биллэриллибитэ.
Бүгүн кулун тутар 16 күнүгэр Өрөспүүбүлүкэ үрдүнэн улуу киһибит төрөөбүт күнүн ытыгылаан, сарсыарда 10 чааска, “Свет Кулаковского- Өксөкүлээх сардаҥата” аахсыйа — символическай тыыннаах чүмэчи уматыыта бары үөрэх, култуура тэрилтэлэригэр ыытылынна.

Бу аахсыйаҕа Ф. Г. Сафронов аатынан оройуоннааҕы киин бибилэтиэкэ эмиэ кытынна. Ааҕар саалаҕа уһулуччулаах бэйиэт Өксөкүлээх Өлөксөй сардаҥата сандаара умайда…