Бүгүн, кулун тутар 28 күнүгэр, сахалыы ааҕыыны көҕүлүүр сыаллаах «Чуолкайдык аах! Доргуччу аах!» диэн ааҕыы күрэҕэ буолан ааста. Оҕо кинигэтин нэдиэлэтин чэрчитинэн ыытыллар тэрээһиҥҥэ барыта 14 оҕо кыттыыны ылла. Ньурба куоратын оҕолоро эрэ буолбакка, сынньалаҥнарыгар кэлэ сылдьар Мирнэй уонна Дьокуускай куорат оҕолоро эмиэ бааллара кэрэхсэбиллээх. Күрэх саҕаланыытыгар библиотека кыраайы үөрэтэр салаатын үлэһитэ Маргарита Романовна Ноева оҕолорго уос-тиис хамсаныыларын, тыл былчыҥнарыгар эрчиллиилэри оҥоттордо. Бука бары кыһаллан үтүгүннүлэр, ыраастык саҥарарга бэлэмнэннилэр. Ол кэннэ икки бөлөххө хайдан, балаһыанньа быһыытынан үс араас тиэкиһи, эрдэттэн бэлэмнэммэккэ эрэ, дьон иннигэр доргуччу ааҕан иһитиннэрдилэр. Ол курдук, бастаан хоһоон уонна кэпсээнтэн быһа тардыыны олус кыһаллан олорон аахтылар. Онтон салгыы алта бастыҥ көрдөрүүлээх кыттааччылар «Кэскил» хаһыаттан ыстатыйалары ааҕан көрөөччүлэр болҕомтолорун тартылар. Оҕолор тутатына, айымньы ис хоһоонун билбэккэ аахпыт буолан, долгуйдаллар да, кыбыстыбакка, боччумуран олорон аахпыттарыттан киһи үөрэр. Түмүккэ икки бөлөххө биирдии кыайыылааҕы быһаардыбыт. 2-4 кылаастар үөрэнээччилэрин ортолоругар Диана Нургалина, ордук үчүгэйдик, сыыспакка, доргуччу ааҕан кыайыылаах буолла. Кини Ньурба куорат 3-с нүөмэрдээх алын сүһүөҕүн оскуолатын 3б кылааһын үөрэнээччитэ. Онтон 5-8 кылаастарга бастыҥ ааҕааччы ааты Слава Елисеев ылыан ылла. Кини Ньурба куорат 2-с нүөмэрдээх оскуолатын 6в кылааһын үөрэнээччитэ. Түгэнинэн туһанан кыайыылаахтары эҕэрдэлиибит уонна кинилэр төрөппүттэригэр махталбытын биллэрэбит. Билиҥҥи кэмҥэ оҕо сахалыы билэригэр, саҥарарыгар, ааҕарыгар улахан болҕомто ууруллар. Чуолаан төрөппүттэр манна кыһаналлара ирдэнэр. Онон оҕолорбутун сахалыы тыыҥҥа, төрөөбүт тылбытын таптыырга, харыстыырга иитэргэ кыһаллыаҕыҥ диэн ыҥырыынан суруйуубун түмүктүүбүн.

Ушканова Я.В.