Муус устар 16 күнүгэр Ньурбатааҕы киинэммит ситим иһинэн үлэлиир «Ньурба уоттара» литературнай түмсүү актива Маалыкай модельнай библиотекатын библиотекарэ Аммосова Вера Петровна салайар «Аартык» литературнай түмсүү 10 сылыгар анаммыт дьоро күнүгэр ыалдьыттаатыбыт.
Сарсыада 9 чаастан айаннаан оруобуна 12 чааска Маалыкай бороҥ буоругар үктэнэн, балаҕаннарыгар сахалыы сиэринэн-туомунан көмүлүөк оһоҕу айах тутан, хомус, тойук эҕэрдэнэн уруйданныбыт, Мойтохонов Арылхан оһуокайыгар киирэн үҥкүүлээтибит. Степан Васильев аатынан түмэлгэ Наталья Васильевна бэрт интэриэһинэй экскурсия ыытта. Соловьева Вера Григорьевна Маалыкай остуоруйатыттан хас да кэрэхсэбиллээх түгэннэри эбэн бэлиэтээн кэпсээтэ.
Тэрээһин сүрүн чааһын «Айар киин» норуот айымньытын дьиэтигэр Вера Петровна, Изольда Васильевна иилээн-саҕалаан «Аартык» литературнай түмсүү 10 сыл иһигэр туох үлэ-хамнас барбытын, туох ситиһиилэммиттэрин улахан экран нөҥүө көрдөрө-көрдөрө билиһиннэрдилэр. Сүргэни көтөҕөр, сүрэҕи ыллатар бэрт истиҥ кэнсиэр долгунугар уйдаран ыллыбыт. Яков Тыасытов «Дойдум дьоно» хоһоонугар бүтүн өрөспүүбүлүкэ үрдүнэн биллибит ырыа икки төгүл ылланна.
Маалыкай баһылыгын солбуйааччыта Иванова Изабелла Егоровна, «Ньурба уоттара» түмсүү салайааччыта Д.Н.Пономарев-Дьолуолаах уонна Маалыкай тэрилтэлэрэ «Аартык» литературнай түмсүү 10 сылынан эҕэрдэлээтилэр. «Аартыктар» киин библиотека методиһа Ирина Ивановна Павлова, «Ньурба уоттарын» эҕэрдэ хоһооннорун түмэн оҥорбут буклетыгар олус үөрдүлэр.
«Санаан-ахтан ааһыаҕыҥ» бырааһынньык түһүмэҕин «Айар киин» норуот айымньытын дьиэтин уус-уран салайааччыта Иван Харитонов салайан ыытта. Өлгөм астаах сандалы тула салгыы сынньалаҥ киэһэтэ сэргэхтик барда. Аһаҕас микрофоҥҥа айар куттаахтар, олохтоохтор да, ыалдьыттар да, элбэх истиҥ ахтыылары иһитиннэрдилэр, хоһооннорун аахтылар.
«Ньурба уоттара» ыыппыт «Көрдөөх түгэннэр» тургутук түмүгүнэн кыайааччыларга сэмэй бириистэр оонньоннулар.
Айар талааннаах «Аартыктар» аламай бэлиэ күннэригэр кэрэ-ыра санаалаах ыалдьыттаан, ирэ-хоро кэпсэтиһэн, инники үлэлэрбитин чопчулаһан астына көрүстүбүт. Биир идэлээхпит Вера Петровна Аммосова түмэр, салайар «Аартыктара» инники аартыктара өссө ситиһиилэнэ, кэскиллэнэ турдун диэн баҕа санаабытын тиэрдэбит.
Е.И.Софронова, Киин библиотека үлэһитэ
