Бүгүн, муус устар 20 күнүгэр, Оҕо уонна ыччат бибилэтиэкэтигэр Олохтоох бэйэни салайыныы күнүгэр анаан сэргэх тэрээһин буолан ааста. Биһиги ыалдьыттарбытынан «Ньурба оройуона» МТ дьиэ кэргэн уонна социальнай эйгэ боппуруостарыгар салаа сүрүннүүр исписэлииһэ Александров Павел Михайлович уонна «Ньурба оройуона» МТ Тыа хаһаайыстыбатын Департаменын салайааччыта Ушканов Леонид Владимирович буоллулар.

Сэргэх истээччилэринэн Ньурбатааҕы техническэй лицей актыбыыс үөрэнээччилэрэ уонна Ньурба техникумун устудьуоннара буоллулар. Ыҥырыылаах ыалдьыттар олохтоох бэйэни салайыныы туһунан оҕолорго олус өйдөнүмтүөтүк быһааран биэрдилэр, үлэлэрин ис хоһоонун кэпсээн сэҥээриини ыллылар. Ол курдук, истээччилэр интэриэһиргээн араас ыйытыылары биэрдилэр. Холобур, баһылыктыы олорбут кэмнэригэр олоххо киллэрбит бастыҥ проектарын тула, хамнас кээмэйин, пандемия бириэмэтигэр хайдах үлэлээбиттэрин, туох ыарахаттары көрсөллөрүн уо. д.а. Бу кэпсэтии түмүгэр баҕар биир эмит оҕоҕо улаатан, бар дьоммор туһалаах дьокутаат дуу, баһылык дуу, көхтөөх уопсастыбанньык дуу буолуом диэн санаа киирбит буолуон сөп. Эдэр ыччат былааска чугас буоларыгар, төрөөбүт дойдулара сайда турарыгар бэйэлэрин кылааттарын киллэрэргэ кыһаллалларын туһугар маннык тэрээһиннэр инникитин да салҕана туруохтара.

Оҕо уонна ыччат бибилэтиэкэтэ.