Республикатааҕы акцияҕа көхтөөх кыттыы
«Сила книги» бүтүн республикатааҕы акцияҕа Киирэптэр көхтөөхтүк кытынныбыт. «Герой оҕолор» — кинигэни алын кылаас учуутала Иванова Мария Игнатьевна аахпытын оҕолор чуумпуран, болҕомтолоохтук иһиттилэр. Бэйэлэрин саастыы оҕолор хорсун быһыылара, геройдуу олохторо толкуйдатыа, Ийэ дойдуга истиҥ тапталга иитиэ диэн эрэнэбит. Ааҕааччы киэҥ араҥатын хабар маннык араас хабааннаах тэрээһиннэр кэнчээри ыччаппыт кэскиллээх, сайдыылаах, бэриниилээх буолалларыгар туһуланаллара саарбаҕа суох.
Түгэнинэн туһанан сырдыгы, билиини саҕар, ыччаты иитиигэ кылааттарын киллэрсэр биир идэлээхтэрбин библиотекарь күнүнэн эҕэрдэлиибин. Ыраас халлааны, махталлаах ааҕааччылары, билиини, сырдыгы бэйэҕит тула саҕа сылдьыҥ диэн баҕа санаабын тиэрдэбин!
Самаан сайыны көрсө сайылык күнэ
Ыам ыйын 27күнүгэр Киирэп сэлиэнньэтигэр А. А. Моргусов аатынан норуот айымньытын дьиэтин Киирэптээҕи филиалын үлэһиттэрэ, олохтоох библиотека ыытар үгэскэ кубулуйбут Сайылык күнүн бэрт сэргэхтик бэлиэтээтибит. Бу күн күөххэ үктэммиччэ алгыстаах ала адьыннан, нэһилиэкпит эр хоһууттара биэрбит маҥнайгы кустарынан, минньигэс мииннэринэн, көмүс хатырыктааҕынан, салабаарга өрүллүбүт үүттээх чэйинэн дьоннорбутун күндүлээн бары сүргэлэрэ көтөҕүллэн, үөрэн-көтөн, оонньоон-көрүлээн тарҕастылар. Араас эриэккэс күрэхтэһиилэр тиһигин быспакка буоллулар. Ол курдук собо хатырыктааһыныгар, салабаар өрөөһүнүгэр, кус үргээһинигэр саамай түргэн туттунуулаах Юлия Григорьева тэҥнээҕин булбата. Ситии быаны өрөөһүҥҥэ имигэс тарбахтаах эдэр хаһаайка Иванова Оксана Артуровна буолан кыайыы өрөгөйүн биллэ. Сэппэрээтэр хомуйааһыныгар Казакова Нюргуяна эрэллээхтик бастаата. Илии мясорубкатын хомуйааһыҥҥа Сачарысова Күннэй түргэн туттунуулааҕын көрдөрдө. Кыттыбыт, миэстэлэспит дьоннорбут бары бириистэринэн бэлиэтэннилэр. Кыайан кэлбэтэх аҕам саастаах, доруобуйаларынан хааччахтаах дьоннорбутугар алгыстаах алаадьыттан, кус этин, миинин, искэхтээх эмис соботтон, мииниттэн дьиэлэригэр илдьэн биэрдибит, самаан сайын үүммүтүнэн эҕэрдэбитин тиэртибит. Дьоммут-сэргэбит бу тэрээһинтэн чахчы астынан-дуоһуйан, сүргэлэрэ көтөҕүллэн үтүө-махтал тыллары этэн тарҕастылар.
Николаева А. И.
