От ыйын 2 күнүгэр Ньурба оройуонун Акана нэһилиэгэ төрүттэммитэ 195 сылын чэрчитинэн, Ньурбатааҕы кииннэммит бибилэтиэкэ ситимин Аканатааҕы филиалыгар нэһилиэк биир ытык киһитин, советскай-партийнай үлэһит, өр сылларга нэһилиэги салайбыт Ньурба оройуонун, Акана нэһилиэгин бочуоттаах олохтооҕо, Үлэ Кыһыл Знамята уордьан кавалера, кыраайы үөрэтээччи Василий Николаевич Николаев – Куххата Баһылай сырдык аатын иҥэрии үөрүүлээх сиэрэ-туома ыытылынна.
Тэрээһиҥҥэ Акана нэһилиэгин Аҕа баһылыга Е.М.Семенов, Ньурба оройуонун дьаһалтатын солб.баһылыга Петрова Н.С., кииннэммит библиотека ситимин солб.директора Саввинова Е.А.,ХИФУ профессора,п.н.д Е.М.Поликарпова, тыа хаһаайыстыбатын ветерана, Василий Николаевич үөлээннээҕэ кырдьаҕас суруналыыс И.И.Николаев олоҕун устата үлэни өрө тутан кэлбит ытык киһи туһунан истиҥник ахтан туран, аат иҥэриитинэн эҕэрдэлээтилэр Дьокуускайкай куораттан чугас аймаҕа Дария Афанасьевна Иванова элбэх кинигэ кэһиилээх кэлэн, библиотекаҕа туттарда.
Кэлбит ыалдьыттар “Үтүө киһи аата үйэлэргэ”-кинигэ быыстапкатын, дойдутун уһун сыллаах остуоруйатын илииннэн суруйан сурукка тиспит элбэх рукопистарын, араас сыллардааҕы хаартыскалары сэҥээрэ көрдүлэр. Тэрээһини Акана ымыылаах ырыаһыта Анна Торохова, эдэр ырыаһыт Милена сэргэх ырыаларынан киэргэттилэр.
Василий Николаевич уола муниципальнай сулууспа ветерана, Акана нэһилиэгэр баһылыгынан үлэлээн, төрөөбүт нэһилиэгин салгыы сайдыытыгар бэйэтин кылаатын киллэрсибит Николай Васильевич аҕатын туһунан сылаастык ахтан туран, билии-көрүү киинэ бибилэтиэкэ сайдыыта – нэһилиэк кэскилэ буоларын сөптөөхтүк өйдөөн, Ньурбатааҕы кииннэммит бибилэтиэкэ ситимин Аканатааҕы филиалыгар аҕатын олоҕун, үлэтин сыаналаан, аатын иҥэрэр үтүө тускуллаах күнүнэн Василий Николаевич оҕолорун, сиэннэрин аатыттан истиҥ эҕэрдэтин уонна махталын тиэриэртэ уонна: — “Аҕабыт Василий Николаевич олоҕун устата элбэҕи аахпыт, кинигэ, хаһыат доҕордоох киһи этэ.Селькор быһыытынан дойдутун дьонун үлэтин-хамнаһын, ситиһиилэрин, оройуон, өрөспүүбүлүкэ хаһыаттарыгар мэлдьи сырдатан суруйара. Ону оччотооҕу сэбиэскэй кэм ааҕааччылара биир сытыы бөрүөлээх селькор быһыытынан өйдүүр буолуохтаахтар. Билигин сыыппара үйэтигэр библиотека бэйэтин аналын сүтэрбэккэ норуот нэһилиэстибэтин харайар кэскиллээх үлэтэ, саҥалыы сайдан иһиэхтин, билиигэ баҕалаах ыччат дьоммут элбии турдуннар. Библиотека дьиэтэ хаһан да иччитэхсийбэтин, саҥа интэриэһинэй бырайыактар айылла турдуннар-диэн баҕа санаатын тириэрдэн туран, олохтоох библиотекаҕа элбэх хайысхалаах принтер бэлэх туттарда.
Түмүккэ Ньурба улууһун, Акана нэһилиэгин бочуоттаах олохтооҕо Василий Николаевич Николаев сырдык аата иҥэриллибитин туоһулуур суругу-бичиги Акана нэһилиэгин баһылыга Ефрем Михайлович, библиотека үлэһитэ Евдокия Саввинова, Николай Николаев үөрүүлээхтик астылар. Бу күнтэн ыла Акана нэһилиэгин библиотеката Василий Николаевич Николаев сырдык аатын сүгэр.
Тэрээһин иккис чааһа Акана нэһилиэгин олорон кэлбит остуоруйатын оҥорууга, сэрии тыыл ветераннарын ааттарын үйэтитиигэ сүҥкэн үлэни оҥорон кэлбит, төрөөбүт нэһилиэгэр баһылыгынан үлэлии сылдьыбыт, Ньурба улууһун Бочуоттаах олохтооҕо, билигин нэһилиэк дьонун-сэргэтин төрдүн-ууһун чинчийиинэн утумнаахтык дьарыктана сылдьар кыраайы үөрэтээччи, төрүччүнү чинчийээччи Владимир Михайлович Николаев “Дьонноох киһи тутайбат” диэн төрүччү кинигэтин сүрэхтэниитэ куйаар ситиминэн ыытыллынна. Владимир Михайлович нэһилиэгин дьонун-сэргэтин төрдүлэрин-уустарын үөрэтииннэн утумнаахтык дьарыктаммыта уонтан тахса сыл буолла. Бу олус эппиэттээх, научнай хабааннаах мээнэ киһи ылсыбат үлэтин ыыта сылдьара олус хайҕаллаах уонна махталлаах. Кэлэр көлүөнэ ыччат ону сыаналыа турдаҕа. Этэргэ дылы дьонноох киһи тутайбат, дьонноох киһи дьоллоох.
Мария Николаева, библиотекарь.
