Ньурбатааҕы оҕо уонна ыччат бибилэтиэкэтигэр кэлэн иһэр Арассыыйатааҕы Аҕа күнүн чэрчитинэн «Аҕаларбыт идэлэрэ» төгүрүк остуол буолан ааста. Бу оскуола оҕолоругар анаммыт идэни талыыга көмө буолар суолталаах тэрээһиҥҥэ 2-с оскуола, гимназия, лицей 7-9 кылааһын үөрэнээччилэрэ кыттыыны ыллылар. Ыҥырыылаах ыалдьыттарынан буоллулар араас идэлээх киэн туттар дьоммут, ыал амарах аҕалара: 50-с сылын идэтигэр бэриниилээхтик үлэлии сылдьар Ньурбатааҕы техническэй лицей физикаҕа учуутала Лазарев Юрий Афанасьевич, «РОСТЕЛЕКОМ» сибээс тэрилтэтин Ньурбатааҕы филиалын салайааччыта Муксунов Василий Саввич, Ньурбатааҕы РЭС сүрүн диспетчерэ Иван Петрович Егоров, Ньурбатааҕы государственнай драматическай театр артыыһа Дмитрий Климентьевич Слепцов. Кинилэр бэйэлэрин оҕо саастарын, оскуолатааҕы, устудьуон кэмнэрин ахтан-санаан аастылар, идэлэригэр кэлбит ураты суолларын туһунан бэрт интэриэһинэйдик кэпсээн дьон болҕомтотун ыллылар. Ону таһынан аҕа буолалларын быһыытынан оҕону иитиигэ бэйэлэрин көрүүлэрин үллэһиннилэр. Ордук сахалыы тыыҥҥа оҕону отой кыра эрдэҕиттэн сыһыарар наадатын бэлиэтээтилэр. Үөрэнээччилэргэ инники өттүгэр идэлэрин сүрэхтэрэ этэринэн талалларыгар сүбэлээтилэр. Маннык көрсүһүүлэр улаатан эрэр оҕолорго сүҥкэн туһалаахтар, онон инникитин өссө да ыытыахпыт турдаҕа.

Оҕо уонна ыччат бибилэтиэкэтэ.