Саха норуотун өркөн өйө, сылаас сырдык санаата, үрдүккэ, кэрэҕэ дьулуһуута, баҕарар баҕата түмүллүбүт тылынан уус-уран сүдү айымньыта олонхо бүтүн аан дойдуга аатырда, саха аатын ааттатта.

Ньурба улууһа саха омук биир саамай уутуйан олохсуйбут төрүт-уус улууһа буолар. Манна былыр-былыргыттан устар ууну сомоҕолуур уус тыллаахтар, сээркээн сэһэнньиттэр, улуу оһуокайдьыттар, аатырбыт олоҥхоһуттар төрөөн-үөскээн, дьон-норуот өйүгэр-санаатыгар иҥэн хаалбыттар. Ол курдук, И. П. Догоюков — Доҕойук Уола XIX үйэ бүтүүтэ ХХ үйэ саҕаланыыта Бүлүү сүнньүгэр тэҥнээҕин булбакка аатырбыта. И. П. Кутуруков, И. М. Харитонов — Саахырдаах Дьуона, С. В. Петров, С. Т. Чочанов, В. Д. Егоров — Айах Баһылай, Д. С. Сергеев, Е. М. Валь, Н. Г. Иванов, Н. Г. Тагров, И. С. Рожин, Г. В. Дуяков, И. М. Иванов — Мурустаал Уйбаан уо.д.а. ХХ үйэҕэ олоҥхоһут, ырыаһыт-тойуксут, оһуокайдьыт быһыытынан киэҥник биллибиттэрэ. Кэнники сүһүөх олоҥхоһуттарынан С.С. Егоровы, Н. Ф. Осипов-Чоомууту, В. И. Иванов-Чиллэ Баһылайы ааттыахха сөп.

Чаппандаҕа литература уонна фольклор музейын төрүттээччи, норуот сэһэннэрин, үһүйээннэрин хомуйааччы Николай Тарасович Степанов Ньурба улууһун 89 олоҥхоһутун анкетатын толорон Саха сиринээҕи Научнай киин архыыбыгар туттарбыта фольклору үөрэтээччилэргэ төһүү күүс буолар.

В. В. Илларионов «Искусство якутских олонхосутов» диэн үлэтигэр Бүлүү сүнньүгэр Ньурба улууһугар элбэх олоҥхоһут баарын тоһоҕолоон бэлиэтээбитэ. Ол курдук, 1971 с. Ньурбаҕа 61 олоҥхоһут олорор диэн бэлиэтэммит. 

Ньурба олоҥхоһуттарын айымньылара үөрүтүллэр, араас таһымнаах сыаналарга испэктээкил да төрүт ньыманан да туруоруллаллар, бар дьон истиитигэр-көрүүтүгэр тахсаллар.

Быйыл саҥа тыйаатырбыт сыанатыгар С. В. Петров-Чыычаах ОҔО ДЬУЛААХ БУХАТЫЫР Ньурбабыт талба талааннаахтарын толоруутугар, култуура департаменын көҕүлээһининэн тахсыаҕа, салҕыы киэҥ сирдэринэн Ньурбабыт олоҥхотун иһитиннэриэхтэрэ, биллэриэхтэрэ!

Утум салҕанар!

Ааҕааччыны кытары үлэлиир салаа.