Тохсунньу 17 күнүгэр Маар сэлиэнньэтин «Алгыс» ЦНТ дьиэтигэр «Проектный код» диэн семинар-практикум буолла. Семинарга Таркаайы нэһилиэгиттэн, баһылык Васильев Владислав Анатольевич салайааччылаах, улахан делегация кытынна. Киирэп сэлиэнньэтиттэн А. А. Моргусов аатынан «Талба» н.а.дь. Киирэптээҕи филиалыттан Кириллина Анна Васильевна, Семенова Лариса Ивановна, библиотекарь Николаева Альбина Ивановна, Д. И. Николаев аатын сүгэр олохтоох оскуола директора Иванова Лаура Никитична, социальнай үлэһит Моргусова Николина Николаевна кытынныбыт. Улуус эдэр ыччакка управлениетын начальнига Валерия Владимирова салайыытынан, улуус проектнай отделын салайааччыта Елена Романова, өрөспүүбүлүкэтээҕи «Межмуниципальный ресурсный центр РС(Я)» АНО экспердэ Дайаана Васильева, «БИБЛАРТ» АНО салайааччыта Марина Илларионова уонна РФ президенин культурнай инициативаларга фондатын Гранын кыайыылааҕа «Якутия миру» проект автора Юлия Васильева, СӨ Ил Дарханын гранын кыайыылааҕа Матрена Габышева кыттыылаах олус туһалаах, интэриэһинэй, наадалаах семинар буолла. Быһа сибээһинэн, Чурапчыттан Саргылана Старостина, Бэрдьигэстээхтэн Ксения Васильева холбонон үлэлэрин — хамнастарын, ханнык бырайыактарынан үлэлииллэрин, тугу ситиспиттэрин сиһилии кэпсээтилэр. Елена Романова СО НКО уонна ТОС хайдах тэринэри, юстиция министиэристибэтигэр регистрацияланар наадатын сиһилии быһааран кэпсээтэ. Дайаана Васильева социальнай проектар тустарынан сиһилии, түһүмэхтэринэн илдьиритэн быһаарда, проект суруйууга туох кистэлэҥнэр баалларын чопчулаан кэпсээтэ. Бу маннык интэриэһинэй семинар, кустаннан ыытыллар буолан, бары нэһилиэктэри хабардыы, олус табыгастаахтык тэриллибит. Бүгүҥҥү тэрээһинтэн элбэҕи билэн, инникигэ үлэлэһэрдии санаалаах кэллибит.

Николаева А. И.